La’o Hamutuk

Bulletin  |  Surat Popular  |  Topic index  |  Reports & Announcements  |  Updates
Reference  |   Presentations  |  Mission Statement  |  LH Blog  |  Search  |  Home

Revizaun ba Lei Fundu Petroleu

24 Maiu 2010. Atualiza iha 1 Setembru 2011

Link to this page in English.

Kontiudu

Tinan lima ona, Fundu Petroleu Timor-Leste servi ona ita nia nasaun nia diak. Desde Fundu ne’e harii, rendimentu mina-rai no orsamentu jeral estadu nian sae liu husi ekspetasaun ne’ebe iha. Ho planu futuru ida ne’ebe ambisiozu, Governu sei halo revizaun ba stratejia investimentu Fundu nian no halo amandemen ba lei ne’ebe kria Fundu ida ne’e. La’o Hamutuk kuidadu tebes, ho diskusaun publiku ida be luan ba asuntu tomak no desizaun sira. Iha pajina web ida ne’e, ami halo rezumu ba informasaun kona-ba Fundu, ho ligasaun hodi halo detailu liu tan. Ami mos esplika mudansa balun ne’ebe konsidera hela, balun husi mudansa ne’e publikamente anunsia ona no balun tan ne’ebe Governu seidauk hahu’u hodi halo konsultasaun publiku.

Ami enkoraja povo hodi estuda kona-ba mudansa sira ne’ebe propoin ba no atu enkaisa ho ativu liu iha diskusaun nia laran. Iha 2005, Lei Fundu Petroleu envigor ho votus unanimidade husi partidu hotu-hotu iha Parlamentu, no ami espera katak mudansa ruma iha tinan ida ne’e mos sei hetan suporta husi politikus Timor-Leste nian seluk no espektru sosial nian. Atu halo hanesan ne’e, sira tenke servi ba interese nasional tempu naruk nian, duke ba prioridade ohin loron nian husi grupo partikular ida.

Nia hu’un

Timor-Leste nia Fundu Petroleu biliaun $6 dolar Estadus Unidus Amerika no besik atu finansia hotu aktividade estadu Timor-Leste nian. Governu foti tokon $512 husi Fundu iha 2009, ne’ebe 86% husi total rendimentu ne’ebe governu simu. Iha orsamentu jeral estadu 2010, ekspeta ba Fundu Petroleu hodi fornese 87% rendimentu estadu nian. Numeru ida ne’ebe sae to'o 97% (tokon $811) ho orsamentu rektifikativu tinan klaran nian.

Fundu Petroleu fo forsa ida ne’ebe fo dalan ba Governu atu aloka nivel gastu ida ne’ebe bazeia ba nesesidade povo nian, relativamente ba fluktuasaun ne’ebe sae no tuun ho mudansa iha rendimentu petroleu, ne’ebe tun sae, depende ba folin mina-rai mundial nian no produsaun petroleu rai laran nian. Fundu ne’e mos halo atu prezerva riku-soin mina-rai no gas Timor-Leste nian balun ba jerasaun futuru. Ita nia depositu husi petroleu naun-renovavel nian sei uza iha jerasaun ida ka rua nia laran, no ita sei depende ba iha ita nia ekonomia nau-renovavel nian atu atende nesesidade estadu no privadu nian hafoin mina-rai laiha ona. Sei difisil atu hasae ekonomia naun-petroleu Timor-Leste nian ho sufusiente, no presiza tempu naruk. Tamba ne’e, justisa ekonomia no pratika ekonomia presiza duni atu jerasaun ohin-loron nian labele gasta hotu ita nia riku-soin sira iha tasi okos no rai-okos nian, maibe tenke prezerva riku-soin balun ba benefisiu jerasaun aban-bain-rua nian.

Iha 2005, hafoin konsultasaun publiku ne’ebe ekstensivu, Timor-Leste nia Lei Fundu Petroleu (Port.) nian envigora, lei ida ne’e nudar lei ne’ebe diak liu iha mundu, entermus nian kontiudu no oinsa atu implementa durante tinan lima liu ba. La’o Hamutuk hare prosesu lei Fundu Petroleu nian iha ami nia Buletin Marsu 2007.

Lei Fundu Petroleu limita montante ne’ebe tenke foti husi Fundu kada tinan-tinan ba iha Rendimentu Sustentavel Estimadu ida, kalkuladu nudar 3% husi total valor osan iha Fundu no rendimentu ne’ebe ekspeta iha futuru husi kampu mina-rai ne’ebe durante ne’e dezenvolve ona. Ministeriu Finansa kalkula RSE ba 2010 hamutuk tokon $502, no RSE ba iha orsamentu estadu tinan kotuk nian hanesan hatudu iha grafika kabelak iha liman los. Aleinde mosu iha nia metade, RSE ne’e hafraku Governu nia hanoin durante tinan barak nia laran, husi “limita” ida ba iha “mata-dalan” ida ba iha “sasukat” ida.

Lei fo dalan ba Governu atu gasta liu RSE karik sira hato’o esplikasaun ne’ebe detailadu ida ba Parlamentu oinsa gastu ne’e ba interese nasaun nian ba tempu naruk, no Parlamentu konkorda. Governu koko atu halo ida ne’e iha 2008, maibe Tribunal Rekursu deside katak esplikasaun ne’e la hatan ba rekerimentu sira ne’ebe lei husu no Governu ne’e la hetan autorizasaun atu gasta liu RSE. (Ikus mai, difikuldade sira ho ezekusaun orsamentu nian dudu Governu atu tuir desizaun tribunal nian, tamba tribunal kua montante ne’ebe atu aloka ba Fundu Ekonomia Estabilizasaun nian hodi ba subisidiu ba importasaun fos nian.)

Iha 2009, Governu gasta liu RSE ho tokon $104. Iha Orsamentu Estado 2010 original nian nafatin tuir kalkulu RSE tokon $502, maibe Orsamentu Rektifikativu 2010 gasta liu tan, tokon $309. Orsamentu Estadu proposta ba 2011 kalkula RSE tokon $734, tanba prediksaun folin mina aas liu.

Kalkulasaun RSE bazeia ba ekspetasaun ida katak retornu (funan) ne’ebe hetan husi investimentu Fundu Petroleu nian sei ba tempu naruk nian, produs rendimentu 3% ne’ebe as liu inflasaun. Karik ne’e loos, montante osan ne’ebe igual ho RSE sei hasai husi Fundu kada tinan-tinan ba oin. Maske ida ne’e la bele limita gastus sira ne’ebe nesesariu duni atu fo asesu ba saude, edukasaun no servisu nesesariu sira seluk ba Timor-Leste nia populasaun ne’ebe sae maka’as. Ida ne’e hatudu iha grafika iha liman los, ne’ebe linha kotu-kotu indika ba osan hira mak RSE sei fo permite ba kada sidadaun ida-idak ba kada tinan ida. To’o karik Sunrise no kampu mina-rai no gas sira seluk dezenvolve ona, ne’e sei dupla RSE, maibe montante ne’ebe kada ema ida hetan sei iha deit dolar ida ba kada loron ida. Iha Marsu 2009, La'o Hamutuk halo analiza ba “sustentabilidade” husi Rendimentu Sustentavel Estimadu.

Diskusaun ba revizaun Fundu Petroleu

Durante tinan lima liu ba, rezultadu husi investimentu Fundu nian ne’ebe ita hetan iha maizumenus 2% iha inflasaun nia leten, stratejia investimentu ohin-loron nian iha 95% ba Obrigasaun Banku Federal Governu EUA nian diak liu tan duke stratejia sira seluk durante tinan 2005-2010. Maske retornu menus husi asumsaun 3% ne’ebe sai baze ba kalkulasaun RSE, hadalan Ministra Finansas hodi bolu ida ne’e nudar “Insustantavel Rendimentu Sustentavel Estimadu.” Esforsu ida atu hasae retornu husi Fundu Petroleu, dudu Governu hodi esplora hela atu modifika stratejia investimentu nian ba Fundu ne’e hodi inklui asoens (ekidade) no eventualmente, modelu investimentu seluk tan. Sira mos diskute hela revizaun seluk ba Lei Fundu Petroleu, ne’ebe atualmente limita investimentu ba instrumentu sira seluk aleinde obrigasaun/titulu Governu nian to’o iha 10% husi total Fundu nian (hare ba box iha kraik). Ministeriu Finansa kaer metin ba Towers Watson, Kompanha Asesoria ba investimentu nian husi Hong kong atu fo asesoria kona-ba stratejia investimentu nian.

Iha Junhu 2009, La’o Hamutuk publika artigu badak ida Diversifika Investimentu Fundu Petróleu? La'os Agora. Ami fiar katak topiku ida ne’e tenki hare ho didiak. Tamba to’o ohin loron, seidauk investe Fundu ne’e iha asoens (lei atual permite 10% ba asoens), ami fiar katak Timor-Leste tenke nafatin iha limitasaun ne’e to’o ita hetan eksperiensia iha tinan baluk tan husi risku no volatidade husi merkadu asoens nian, ne’ebe nia kapital no mos nia funan bele sae ka monu. Hanesan iha diagrama ne’ebe hatudu iha liman los (hanehan ba diagrama ne’e atu hare ho boot), presu asoens Estadus Unidus nian ohin-loron nafatin hanesan iha tempu tinan lima liu ba wainhira harii Fundu.

Iha loron 6 Marsu 2010, Ministeriu Finansa sai uma nain ba “mini-seminar” ida ba Parlamentu no Sosiedade Sivil ho aprezentasaun husi :

Iha loron 4 Maiu, NGO Timor-Leste ida, Luta Hamutuk organiza seminar ida “Vantazem no Dezafiu Diversifikasaun Investimentu Fundu Petrolifeiru”. Aleinde aprezentasaun sira ne’ebe hetan iha kraik, eis Primeiru Ministru Mari Alkatiri no Prezidente Komisaun Finansa Parlamentu nian Manuel Tilman mos koalia:

Dokumentu Diskusaun: "Revista ba Lei Fundu Petroleu"

La'o Hamutuk hetan kopia husi dokumentu diskusaun ida ne’ebe sirkula husi Diresaun Nasional ba Fundu Petroleu ho Ministeriu Finansa, iha Janeiru 2010. Maske dokumentu diskusaun ida ne’e seidauk publikamente fo sai no dala-ruma la reprezenta desizaun ne’ebe governu sei foti, dokumentu ida ne’e inklui ho hanoin husi Investment Advisory Board (IAB), konsultan no staf kona-ba tarjeitu sira ne’ebe iha posibilidade hetan revizaun husi Lei Fundu Petroleu.

Iha fulan Setembru 2010, Ministeriu fo sai Relatoriu Anual ba Fundu Petroleu iha tinan 2009, inklui conselhu husi IAB ba Ministru. Ida n'ee inklui memorandum kona ba revisaun posivel ba Artrigu 14 no 15 iha Lei kona-ba investimentu.

La’o Hamutuk fiar katak povo tenke hatene ba saida deit mak konsidera atu hetan revizaun, tamba ne’e ami halo rezumu ba opsaun balun iha dokumentu diskusaun ne’e:

Lei AtualOpsaun ba posibilidade atu halo revizaun
Autoridade Bankaria no Pagamentu (ABP/BPA) nudar Jestor operasional husi Fundu.

1. Transfere responsabilidade operasional nian barak liu ba Ministeriu Finansa, inklui atu hili jestor eksterna sira no hetan autoridade ida ne’ebe boot iha futuru.

2. Permite Parlamentu atu determina jestaun operasional nian ba entidade seluk.

External investment managers are appointed by the BPA.Jestor Eksterna hili husi Ministra Finansa.
Investment Advisory Board inklui ema sira ne’ebe la hili husi Ministeriu Finansa no nia sekretariadu mak ABP.

Membru IAB tenke deklara sira nia asset, properiedade no rendimentu kapital, no konta bankaria wainhira sira hahu’u halao kna’ar.

Hasae ulun-boot sira husi ABP no Departamentu Tezoureiru nian nudar membru IAB; membru hotu-hotu hili husi Primeiru Ministru ho konselu husi Ministra/u Finansa.

Transfere sekertariadu IAB nian ba Ministeriu Finansa.

Membru IAB tenke deklara katak sira laiha konflitu ba interese. Karik Ministra/u husu, sira tenke deklara sira nia asset.

Estratejia Investimentu estabelese husi Ministeriu Finansa, konsistete ho regulamentu iha lei Fundu Petroleu no hetan konselu husi IAB.

Ministra/u estabelese Politika Investimentu ida hodi difersifika investimentu Fundu nian no risku balansiu nian no retornu ne’ebe ekspeta. Tuir politika ida ne’e, Ministra/u iha liberdade atu halo desizaun investimentu nian. Rezumu ida husi politika ne’e tenke fo ba Parlamentu, maske laiha rekerimentu ba politika ne’e atu fo sai ba publiku.
Fundu tenke investe 90% iha titulu (bond) governu EUA, atu minimize risku husi lakon ba tempu badak no tempu naruk iha valor Fundu prinsipal nian.

1. Pelu menus 60% investe iha titulu/bond (inklui ba titulu sira ne’ebe laos governu nian), 40% ba leten investe iha asoens, 5% iha instrumentu sira seluk, inklui derivados (sujere husi IAB). Dokumentu diskusaun sujere katak 25% investe iha asoens iha tinan 1-2 sei fo retornu real 3% ne’ebe espera husi formula RSE nian.

2. Laiha restriksaun ba investimentu sira, mantein katak sira nafatin iha mata-dalan politika investimentu nian.

Rendimentu Sustentavel Estimadu ne’e 3% husi riku-soin petroleu nian: total osan iha Fundu no mina-rai iha rai-okos.Hasai tiha figura 3% husi lei, hodi troka ho “intervalu ida husi 3% ba iha 5%” ne’ebe determina husi baze rekerimentu orsamental Governu nian, laos husi "estimasaun rata-rata ba retornu real” husi investimentu ne’ebe sai spesifiku iha lei atual.
Gasta liu RSE presiza esplikasaun ida ne’ebe detailadu ne’ebe espesifiku no Parlamentu fo aprovasaun.Gasta liu to 5% sei la presiza esplikasaun..
Transferensia hotu husi Fundu tenke hetan autorizasaun husi Orsamentu Jeral Estadu ne’ebe aprova husi Parlamentu.Karik orsamentu la hetan aprovasaun tuir tempu, Governu bele hasai osan husi Fundu ba “dotasaun temporariu” lahoo aprovasaun Parlamentu nian.
Fundu labele uza nudar garantia ba deve.Adisional “eksepsaun bainhira regula fali husi lei” sei halo klauza la iha valor, katak deve sei regula husi lei seluk.
Lei Fundu Petroleu mak maka’as liu duke lei sira seluk. (desizaun husi Tribunal Rekursu, 27 Outubru 2008)Wainhira Lei Orsamentu no Jertaun Finanseiru ka lei petroleu sira seluk ne’ebe iha relasaun tan, ne’ebe kontrariu ho Lei Fundu Petroleu, entaun Lei Fundu Petroleu sei la vale.
Ema hotu-hotu bele hato’o reklamasaun ba Provedor Direitus Humanus no Justisa.Maske la diskute iha dokumentu (papel) Ministeriu nian, Artigu 45 lei Fundu Petroleu nian tenke amenda hodi inklui Komisaun Anti Korupsaun.

Iha loron 10-11 Maiu, Ministeriu Finansa organiza seminar internasional ida kona-ba Jestau ba Fundu Petroleu (Managing the Petroleum Fund), ho orador internasional balun hodi hato’o asuntu barak. Ministeriu halo aprezentasaun sira ne’e hodi bele hetan:

Orador balun esplika sai kna’ar no servisu husi ajensia sira ne’ebe involve iha jestaun Fundu Petroleu Timor-Leste:

Papel diskusaun no seminar nian hatudu atensaun ida ne’ebe boot ba oinsa Timor-Leste bele determina atu tolera ba saida mak “nivel risku”, no halo advokasia atu halo investimentu ne’ebe iha risku boot liu ho ekspetasaun atu hetan retornu ne’ebe boot liu iha tempu naruk. Iha konsiderasaun oituan katak iha toleransia ba risku ne’ebe diferente entre nai-ulun sira no povo, jovens-katuas, vila no rural, riku no kiak. Difikuldade sira ne’ebe belit hela iha stratejia investimentu nian ba tempu naruk nian wainhira ulun boot sira ba hasoru eleisaun kada tinan lima ka mensiona sai.

Maske seminar hirak ne’e ajuda duni atu hasae konhesimentu husi Governu, Parlamentu no sosiedade sivil sira, seminar ne’e la bele subtitui konsultasaun publiku no dialogu publiku nian lolos. Ami enkoraza Ministeriu Finansas atu publikamente sirkula revizaun tomak husi Lei Fundu Petroleu nian ne’ebe sira konsidera hela, no konvida submisaun no audensia publiku barak iha nasaun tomak. Molok esbosu lei ida lori ba Konseillu Ministru, prosesu konsultasaun publiku tenke halao ona, no Parlamentu tenke mos halao konsultasaun publika ida mos molok halo revizaun no halo aprovasaun ba proposta governu nian. Ida ne’e hanesan dalan ida deit atu prezerva konsesu nasional no unanimidade Parlamentaria nian ne’ebe atinji duni iha tinan lima liu ba wainhira pasa lei Fundu Petroleu nian.

KKFP hili Dr. Tim Anderson, ekonomista ida husi Australia, atu hakerek relatoriu ida kona-ba asuntu jestaun nian iha relasaun ba Fundu Petroleu no Estratejia Dezenvolvimentu iha Timor-Leste hodi stimula ho luan liu no halo diskusan ida ne’ebe diak entre lider Timor-oan no Sosiedade Sivil. Dr. Anderson halo aprezentasaun ida (Ingles) no distribui esbosu dokumentu (Ingles) nian ba NGO Forum iha loron 13 Julhu. Aprezentasaun ida ne’e fo perspetiva ida ne’ebe diferente kompara ho konferensia ne’ebe organiza husi Governu, no kobre topiku sira tuir mai:

  • Fundu Petroleu: Asuntu Jestaun
    • Prinsipiu sira hodi hari’i no obstaklu sira ohin-loron nian
    • Fator risku partikular nian ba Timor-Leste
    • Fundu Riku-soin Soberania nian no dezenvolvimentu
    • Opsaun reforma fundu investimentu
    • Implikasaun institusional
  • Estratejia Dezenvolvimentu iha Timor-Leste
    • Estratejia dezenvolvimentu global no iha Timor-Leste
    • Stratejia, debate seitor sira ne’ebe haluha tiha.

Iha Junhu 2010, Governu hato’o “orsamentu rektifikativu” ida ba Parlamentu ne’ebe tesi ona prinsipiu sira husi Lei Fundu Petroleu nian, no La’o Hamutuk halo submisaun ida hodi esplika katak, diak liu atu amenda lei duke atu viola lei. Maske Komisaun C konkorda ho rekomendasaun husi La’o Hamutuk, plenaria Parlamentu nian halo desizaun politiku ida no aprova rektifikasaun ida ne’e no la halo mudansa ne’ebe boot duni. Rektifikasaun ida ne’e sei hasai osan tokon $811 husi Fundu Petroleu durante 2010, liu Rendimentu Sustentavel Estimadu tokon $309.

Iha loron 16 Agusto 2010, ekonomista Alistair Watson husi IMF fo presentasasun by sosiedade sivil kona ba Regime Fiskal Timor-Leste & Kalkulasaun RSE tuir konvite Ministeriu Finansas nian.

Setembru 2010: Procesu revizaun aselera lalais

Iha fulan Setembru 2010, the Investment Advisory Board (IAB) fo sai Statement of Investment Beliefs and Principles. Misaun IAB nian atu "fo konsellu ba Ministra Finasas atu asegura katak investimentu Fundu Petroleu bele fo benefisio ba jerasaun sidadaun Timor-Leste nian agora no futuru, atu masimiza valor tempu naruk husi rekursu nao-renovavel Timor-Leste nian, no investimentu prudentu osan rai hela. Dokumentu ida ne'e desenvolve konseitu sira husi seminariu fulan Maio 2010, no fo koragem ba diversifikasaun ba asoens (ekidade) no obrigasaun, ho externalmente jestaun investimentu.

Iha loron 23 Setembru,  La'o Hamutuk publika informasaun kona-ba tentasaun kambalasu iha tinan 2009 atu nauk liu USD bilaun ida husi Fundu Petroleu. Estadu rezeita tentasaun ida ne'e, hatudu importansia lei ne'ebe forte atu proteze transparensia no prevene kambalasu iha futuru.

Iha loron 28 Setembru, Parlamentu aprova ona pedidu husi Governu atu halo revisaun Lei Jestaun Financeiru husi 2009 atu adia prosesu ba Orsamentu Jeral Estadu 2011 nian ba fulan ida. Konsellu Ministru sei proposta OJE ba Parlamentu molok loron 15 fulan Novembru, tanba ezekusaun orsamentu 2010 kleur tebes, maske molok aumenta ho rektifiksaun iha tinan klaran.

Iha loron 29 Setembru, Konsellu Ministru simu aprezentasaun kona-ba diversifikasaun investimentu Fundu Minarai nian, hanesan "Haree ba faktu ida katak, Lei Fundu Minarai nian oras ne’e fó dalan ona atu iha fleksibilidade ba investimentu, mak presija tebes atu halo alterasaun ba Lei ne’e, atu nune’e bele kontinua iha diversifikasaun iha estratéjia investimentu kona-ba lukru hirak ne’ebé tama liu husi esplorasaun minarai atu nune’e bele fó sustentabilidade ba rendimentu. Klibur servisu nian ida husi Ministériu Finansa halo ona proposta alterasaun ba Lei ne’e, hodi hato’o mós hanoin ba Konsellu Konsultivu Investimentu nian no mós ba konselleiru sira hosi rai liur. Proposta ne’e la kleur tan sei hato’o ba iha Konsellu Ministru." Konsellu Ministru mos diskuti planu atu diversifika investimentu Fundu Minarai nian no prosesu atu iha tempu oin mai dezenvolve jestaun no estratéjia investimentu Fundu nian.

Konsellu Ministru kontinua ona diskusaun ida ne'e iha semana rua tan tanba tenke halo alterasaun ba Lei ne'e atu fo fatin ba diversifikasaun investimentu. Iha loron 13 Outubru, grupu traballu Ministériu Finansas aprezenta sira nia proposta alterasaun. Sira fo proposta alterasaun kona-ba polítika investimentu no perfil ba risku; tranferénsia/regra levantamentu; uza Fundu Minarai hanesan garantia ba empréztimu; ba Jestaun Operasionál; no ikus liu, iha Consellu Konsultivu ba Investimentu.

Iha loron 18 Outubru, Ministra Finansas no Diretor Jeral Autoridade Bankaria no Pagamentu (ABP/BPA) anunsia katak sira hili ona kompania Inglatera ida ho naran Schroders Investment Management Ltd. hanesan jestor external ba 4% husi Fundu Petroleu, maizoumenus tokon $260. Schroders atu investe iha ekidade (equities/stocks) iha merkadu desenvolvidu. Ministra-nia aprezentasaun esplika katak, maski ida ne'e primera vez Fundu Petroleu investe iha ekidade, pasu ida ne'e uza fleksibilidade tomak husi Lei Fundu Petroleum agora. Entaun, Konsellu Ministru diskuti revizaun atu aumenta prosentagem iha ekidade lista iha merkado, no mos fo lisensa ba investimentu to'o 5% Fundu iha ekidade privada, rai, no infraestruktura.  Ministra espera Parlamentu bele aprova mudansa sira ne'e molok fulan Marsu 2011.

Iha "Mini Seminariu kona-ba Jestaun Fundu no Altersaun ba Lei Fundu Petrolifero," Ministeriu Finansas fahe esboso lei atu mudar Lei Fundo Petroleu (Ingles, mos Portuguese), no fo aprezentasaun kona-ba asunto prinsipal. Ministeriu konvite komentariu molok 5 Novembru.

Iha loron 29 Outubru, La'o Hamutuk produz programa radio kona-ba Revisaun Lei Fundu Petroliferu.

La'o Hamutuk fo submisaun ida (mos Ingles) ba Ministeriu Finansas.  Ami-nia submisaun hatete katak:

  1. Sedu liu atu tau metade husi Fundu ba iha Merkadu Ekidades.

  2. Labele hafraku regra Rendimentu Sustentavel Estimativa.

  3. Mantein nafatin ABP/BPA nudar Jestor Operasional ba Fundu.

  4. Mantein KKI/IAB nia independensia.

Submisaun seluk mai husi Luta Hamutuk, Banku Mundial, no Autoridade Bancaria no Pagamentu.

Parlamentu aprova Lei

Hafoin diskusaun barak, iha loron 3 Junu 2011, Konsellu Ministru aprova ona (mos Ingles ka Portugese) Proposta Lei kona-ba alterasaun dahuluk ba Lei Fundu Petroliferu, atu haruka ba Parlamentu atu hetan approvasaun. "Proposta lei ne’e hakarak altera regra no prinsípiu sira investimentu nian, hodi fó fleksibilidade boot ida kona-ba diversifikasaun karteira aplikasaun nian atu bele aumenta retornu husi investimentu iha tempu oin mai, iha kuadru definisaun loloos kona-ba limite espozisaun ba risku. Lei ne’e sei klarifika mós rekizitu hirak ne’ebé Governu atu kumpri bainhira presiza duni halo transferénsia ida ba Orsamentu Jerál Estadu nian liu Rendimentu Sustentável Estimadu, hodi promove iha futuru, fleksibilidade kona-ba entidade ne’ebé sai nu’udar responsável ba Jestaun Operasionál direta. Iha mós alterasaun ba regra nomeasaun membru sira nian no kompozisaun Komité Asesoria ba Investimentu.

"Dokumentu prinsipál ida husi dokumentu hirak ne’ebé konsidera durante revizaun Lei ne’e nian prodús ona husi Grupu Traballu internasionál kona-ba “ Fundu ba Rikeza Soberana” (Fundu Soberanu sira): Prinsípiu no Prátika hirak ne’ebé ema hotu-hotu simu, bolu mós ho naran “Prinsípiu Santiago nian”.

Iha loron 28 Junhu, Governu haruka proposta lei (Ingles ka Portugese), hamutuk ho exposisaun motivos (Ingles ka Portugese), ba Parlamentu Nasional.  BPA halo submisaun. Iha loron 23 Agostu, Parlamentu aprova proposta lei ho alterasaun kiik deit, no Prezidente promulga iha loron 19 Setembru. Version final: Ingles ka Portugese.

 

The Timor-Leste Institute for Development Monitoring and Analysis (La’o Hamutuk)
Institutu Timor-Leste ba Analiza no Monitor ba Dezenvolvimentu
Rua dos Martires da Patria, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: 
info@laohamutuk.org    Web: http://www.laohamutuk.org    Blog: laohamutuk.blogspot.com