Asunto principais: Justisa Rai no Justisa ba Krime Graves

Iha kraik:

• Justisa Rai iha Timor-Leste

• Glosáriu rai-nian

• Lei ba Rai tranzitoriú

• Konsultasaun publiku kona ba Lei ba Rai

• Timór-Leste nia partisipasaun iha asaun global hasoru mudansa klimátika

• Osan husi doador no fonte seluk iha Timór-Leste desde 1999

• Justisa ba Timór-Leste Nafatin Nu'udar Obrigasaun Internasionál ida ne'ebé Seidauk Atínje

• Tinan 10 koalia kona ba justisa iha Konsellu Seguransa ONU

• Sobrevivente Likisá Hatoo Petisaun Ba Sira-Nia Ulun Boot Sira

• La'o Hamutuk karta ba Konsellu Seguransa

• Editorial: Rejeita impunidade, la'o ba justisa

• Mai servisu iha La'o Hamutuk

• Saida mak no se mak La'o Hamutuk?

Justisa Rai iha Timor-Leste

Rai nu'udar parte fundamentál ida ba prosesu dezenvolvimentu Timor-Leste nian. Rai fó nesesidade lor-loron hanesan hela fatin, ai-han no enerjia. Tinan sanulu hafoin konsulta popular liu tiha, Timor-Leste tenke deside prinsípiu no objetivu sira husi sistema rai nian. La ho ne'e, sei la iha vizaun klaru atu sai matadalan ba lei sira kona-ba rai, regulamentu, asisténsia no instituisaun sira ne'ebé presiza atu rezolve konfuzaun kona-ba nain ba rai. Sistema rai dezenvolve ho desizaun rohan-rohan de'it; la tuir planu ne'ebé klaru ka kle'an. Timor-Leste presiza prosesu ida ne'ebé la'os rohan-rohan maibe haree parte hotu no envolve ema barak se ita hakarak atu rezolve asuntu rai agora, no atu proteje ema nia direitu ba rai.

Introdusaun

Kolonialista Portugesa sira no okupante Indonesia sira na'ok rai husi ema no komunidade Timor. Sira hasees tiha ema Timor husi sira nia rai, no fó rai ne'e ba sira nia belun no ema ne'ebé fó tulun ba sira, no hakerek lei atu lejitima sira nia asaun hirak ne'e. Maski iha sistema la justu ne'e nia laran, ofisial sira ne'ebé koruptu hasai títulu (hanesan sertifikadu) barak ho ilegal. Referendum liu tiha, violensia ne'ebé hala'o husi TNI/milisia obriga ema atu sai husi sira nia uma tan, estraga dokumentu sira rai nian, no 70% husi infraestrutura (hanesan uma, ponte, nsst.) iha Timor-Leste laran tomak. Esforsu dezenvolvimentu tuir mai kria oportunidade servisu no oportunidade seluk iha area vila nian, liu-liu iha Dili, ne'ebé dada ema barak atu muda mai Dili. Asuntu rai ne'ebé la rezolve iha Dili kontribui ba krize iha 2006. Iha estimatizasaun ida katak ema na'in 150,000 halai sai husi sira nia uma no liu ema 10,000 mak seidauk fila. Iha Timor-Leste, disputa kona ba rai sei kontinua hela no sé mak nain ba rai seidauk klaru. Situasaun la klaru kona ba rai ne'e la'o nafatin no hamosu tan konflitu.

Maski iha hanehan nia okos durante tinan atus hirak nia laran, Timor-Leste hasees an tiha ona husi situasaun hanesan iha nasaun eis-kolonizadu seluk iha ne'ebé ema-boot lubun ki'ik ida de'it mak kontrola rai maioria. Timor-Leste agora tenke responde ba injustisa rai nian, no kria sistema ida ne'ebé justu no loos, sistema ida ne'ebé bele respeita no fó valor ba istoria ema Timor-Leste nian kona-ba rai. Hanesan iha parte seluk, Timor-Leste bele aprende husi esperiensia rai seluk no la bele repete fali sira nia sala.

Sistema rai tenke hatán ba kestaun hirak tuir mai:

1. Sé mak bele sai nain ba rai?

2. Sé mak iha kbiit atu halo desizaun sira kona-ba sé mak soi iha rai no sé mak la soi?

3. Ita rekoñese ka lae no oinsa, komunidade ka lisan sira ukun sira nia rai?

4. Ita presiza ka lae atu ajuda ema sira ne'ebé laiha rai atu hetan rai?

5. Oinsa ema estranjeiru sira nia asesu ba rai?

6. Saida mak funsaun fundamental rai nian iha Timor-Leste?

Timor-Leste nia sistema rai mós tenke rezolve konfuzaun kona-ba nain ba rai tempu agora nian, no identifika sé mak rai nain, iha direitu atu uza, no rai saida, no iha ne'ebé.

Nasaun sira seluk rezolve problema hirak ne'e liu husi dalan ne'ebé la hanesan. Nasaun balun buka atu responde kona-ba injustisa ba rai nia liu husi fahe rai, seluk komesa hafoun fali sistema rai nian. Desizaun sira ne'e tenke bazeia ba prinsípiu ida ne'ebé klaru, no iha kazu di'ak liu, desizaun sira ne'e diskuti no deside liu husi prosesu konsultasaun ida ne'ebé halao iha nasaun laran tomak no kle'an. Konsultasaun ne'e bele la'o ho objetivu hanesan: dezenvolve governu nia polítika nasionál kona-ba rai, halo konsultasaun nasionál ida ne'ebé kle'an, halo konferensia boot kona-ba rai, no hetan ajuda husi instituisaun sira hanesan Komisaun ida kona-ba rai (Komisaun Rai). Konsultasaun ne'ebé di'ak tenke fó tempu naton ba ema atu komprende no halo diskusaun kle'an kona-ba impaktu sira husi desizaun saida de'it ne'ebé sira halo kona-ba rai, no inklui grupu kbiit-laek sira. Sistema rai ida ne'ebé bazeia ba prinsípiu sira ne'ebé ema barak diskuti no komprende sei hametin direitu ba rai tanba dalan ne'e halo ema barak simu desijaun sira kona-ba rai nian.

To'o agora, asuntu rai nian foka liu ba parte legal. Komesa husi tempu Administrasaun Tranzitoriú ONU nian iha Timor-Leste (UNTAET), administrasaun governante haree liu ba treinu tékniku ba rejistrasaun rai, akordu uza rai sira, no mediasaun (tur hamutuk) atu rezolve konflitu. Foka liu ba lei rai nian sira, definisaun títulu no prosesu rejistrasaun rai. Iha failhansu atu halo planu ba prosesu naun-legal nian, no iha diskusaun uitoan de'it kona-ba impaktu sosial ne'ebé boot liu husi desizaun sira kona-ba rai.

Tanba Timor-Leste seidauk iha polítika nasionál kona-ba rai, lei rai ne'ebé sei kria regra prinsípal ba sistema rai ida mak Lei ba Rai tranzitoriú (transisi) no Kódigu Sivíl. (Esbosu Lei sira ne'e seidauk fó ba Parlamentu.) Lei ba Rai tranzitoriú mak lei ida ne'ebé sei rezolve konflitu kona-ba nain ba rai nian agora dadaun ne'e. Lei ne'e mak sei deside ikus liu kona-ba sé mak nain ba rai pedasuk ida, no deside sé mak iha direitu forte atu sai nain ba rai wainhira iha parte rua ka liu mak hadau malu ba rai ne'ebé hanesan. Kódigu Sivíl kria dalan ba desizaun rai husi loron ba loron, hanesan éransa (liman-rohan) no fa'an no aluga rai. (Hare Lei ba Rai tranzitoriú.)

Rai hanesan sistema ida

"Sistema Rai" ida inklui prosesu lubuk ida ne'ebé liga ba malu hanesan:

• Administrasaun rai: títulu rai, sukat rai, aluga, fa'an, folin rai no rejistu tranzaksaun rai nian sira

• Gestaun no planu uza rai nian

• Rezolusaun disputa: mediasaun, kompensasaun no prosesu duni sai (despeju/eviksaun)

• Prosesu legal: inklui lei sira kona-ba rai, estrutura legal atu rekoñese ukun rai komunidade no rai lisan no lei kona-ba éransa.

• Instituisaun independente ka servisu asisténsia atu ajuda ema atu halo desizaun ho koñesementu no informasaun di'ak no/ka hetan akordus di'ak ba sira.

• Dimensaun finanseiru: inklui empenha, aluga no taxa.

• Fó tulun ba ema ne'ebé la iha rai: hanesan fó rai, harii uma públiku ba ema ki'ak (lalika selu ka selu oituan de'it) ka okupasaun legal (ema iha direitu atu hetan rai tuir sira nia nesesidade se ema seluk la uza rai ida ne'e)

• Tau matan kona-ba prosesu no fo hanoin kona-ba oinsa prosesu ne'e la'o: grupu direitus umanus, komunidade lokál, sosiedade sivíl no instituisaun sira hanesan Provedoria Rai tau matan ba prosesu ne'ebé la'o hela, fó akuntabilidade, hanoin foun no hanoin di'ak sira atu hadi'a.

• Knaar no pratika kultura nian kona-ba rai.

Rai mós iha impaktu ba dezenvolvimentu ne'ebé kle'an liu. Desizaun sira ne'ebé liga ho rai hanesan parte importante ba:

• Assets and liabilities diskusaun ho Indonesia no Portugal (haree klaru responsibilidade no propriedade kada Estadu-nian)

• Zona ba uza rai diferente: fabrika no ema nia hela fatin atu halo iha ne'ebé, (di'ak liu la harii hamutuk tanba fabrika boot la di'ak ba saude)

• Direitu ba bee

• Kultura no identidade lokál

• Migrasaun iha rai Timor nia laran

• Edukasaun finanseira (kona-ba debe, nsst.)

• Sistema kréditu

• Gestaun meiu ambiente

• ervisu ba moris nian ne'ebé depende ba rai (pur ejemplu to'os nain)

• Seguransa sosial

• Estabilidade sosial no dame

Rejistu reklamasaun rai no Ita Nia Rai

Iha fulan Outubru 2007, Ajensia ba Dezenvolvimentu Internasionál Estadus Unidus (USAID) lansa projetu Ita Nia Rai (INR). USAID mak fó osan ba projetu ne'e, no selu ba Associates in Rural Development (ARD Inc.) atu maneja no implementa hamutuk ho ajensia seluk. Projetu ne'e la'o to'o 2012, no iha knaar lima:

1. Informasaun no konsiensia públiku

2. Lei politika rai no regulamentu implementasaun nian.

3. Fó tulun ba Komisaun Rai Nasionál (agora dadaun seidauk iha Komisaun Rai Nasionál)

4. Administrasaun rai (kadastrú, rejistu no sistema títulu rai.

5. Rezolusaun disputa, mediasaun no prosesu atu halo deklarasaun ba rai.

Rejistu deklarasaun rai mak sai ona aktividade ne'ebé ema koñese liu husi Ita Nia Rai. Prosesu ida ne'e fasilita ema individual, grupu sira (inklui kaben-nain), organizasaun sira no Estadu atu reklama rai ne'ebé sira sente katak sira iha direitu ba iha area ne'ebé projetu ne'e hala'o. Ema ida ne'ebé hakarak atu halo deklarasaun ida bele hatudu dokumentu sira ka sasin nia deklarasaun hanesan evidensia ba títulu. INR depois halibur no hatudu mapa kona-ba deklarasaun ba rai lokál. Ema bele halo deklarasaun foun no protesta deklarasaun sira ne'e to'o tempu hatudu mapa ne'e remata, loron 30 loron servisu nian. Se karik iha deklarasaun ne'ebé barak liu ba rai ida, ema sira ne'ebé hadau malu bele tuir mediasaun to'o dala tolu, ka hodi ba Tribunal.

Liu tiha tempu hatudu mapa ida ne'e, laiha tan rejistu ba deklarasaun foun iha fatin ne'e. Maibe, ema bele hato'o informasaun foun ba deklarasaun ne'ebé iha tiha ona, hanesan wainhira rai fa'an ka rai pasa ba ema seluk liu husi éransa. Iha 2008, INR komesa programa "koko" (esperimentu/pilotu) iha Manatuto no Likisá. Agora rejistu deklarasaun mós hala'o ona iha Baucau, Aileu, Bobonaro, Oecusse no Dili. Tuir planu INR nian, to'o 2012, sei rejistu deklarasaun rai privadu to'o 50,000 iha kapital distritu sira.

Gráfiku ida ne'e ladun hatudu realidade husi deklarasaun rai nian to'o agora. Gráfiku ne'e sublinha numeru deklarasaun, numeru pedasuk rai ne'ebé ema halo ona deklarasaun menus liu (hanesan liu husi ema ida ka grupu ida labele deklara rai hanesan). Projetu promove ona deklarasaun kaben-na'in hamutuk, hanesan estratejia prinsipál atu promove direitu feto nian ba rai. Iha Manatuto, tuir kultura lokál, feto iha posibilidade boot liu atu iha direitu sai nain ba rai, no hanesan Manatuto no Likisá rejistu ona deklarasaun barak ba rai (hanesan projetu pilotu), ida ne'e mós halo muda nia figura ba grafikú ne'e. Wainhira projetu muda husi vila ba fatin besik vila, deklarasaun barak liu mak mai husi mane de'it, deklarasaun ne'e mós haree ba fatin rai boot ne'ebé folin atu sae aas liu bainhira vila aumenta. Beibeik parte "entidade legal" iha gráfiku reprezente deklarasaun husi igreja Katóliku no igreja seluk.

Prosesu informasaun públiku INR nian kle'an liu kompara ho projetu husi doador sira seluk. Projetu ne'e mós simu no fahe informasaun liu husi mapa, fotografía no deklarasaun ho lian. Ida ne'e hakmaan liu tan ema ne'ebé seidauk lee didiak atu hola parte, no seluk bele aprende husi modelu ne'e. Komunidade mós iha papél importante hodi halo no haree ba deklarasaun sira.

Nia frakeza prinsipál mak prosesu evaluasaun. To'o agora, ida ne'e fraku no la sistematiku maibé rohan-rohan de'it. Prosesu ida ne'e seidauk uza matenek komunidade nian ho natoon hodi hadi'a no haforsa projetu ne'e. INR haluan prosesu deklarasaun liu tan fatin "pilotu" molok projetu halo evaluasaun ho komunidade (liu husi estudus) hahú iha fatin pilotu.

Rai komunidade no foho

Konflitu barak kona-ba Timor-Leste nia rai ho impaktu aas akontese la'os iha fatin vila, no rai foho barak mak simu aktividades seitor privadu (bisnis), estadu no dezenvolvimentu komunidade-nian. Maski nune'e, aktividades uitoan de'it mak foka ba nesesidade rural. Banku Mundial no peskizador sira husi Universidade Nasionál Australia (Australia National University) halo estimasaun katak liu 90% rai iha Timor-Leste mak rai komunidade ka rai lisan.

Desizaun sira kona-ba rai komunidade komplikadu no presiza haree buat rua iha tempu ne'ebé hanesan. Presiza fó protesaun ba rai komunidade (protesaun estadu mak halo -- hanesan fó tulun ba komunidade atu halo akordu sira ne'ebé loos) no fó protesaun ba komunidade nia nain ba rai (protesaun husi estadu se nia hakarak sai nain ba rai). Durante okupasaun Indonesia nian, rai komunidade barak mak foti no sai hanesan rai estadu, ho estadu nia intensaun atu fó rai sira ne'e ba kompania atu uza.

Projetu INR sei influensia rai komunidade iha dalan importante rua: liu husi ninia ajuda ba Lei ba Rai tranzitioriú no liu husi ninia prosesu rejistu deklarasaun rai. Projetu INR planu atu rejistu deklarasaun rai iha kapital distritu nian (vila sira no fatin besik vila sira), ne'ebé ukun rai hodi husi sistema komunidade-nian ka lisan ne'ebé la dun forte. Benefisiu husi ne'e mak nia la hatama estrutura nain ba rai ne'ebé la respeitu komunidade no mós rai komunidade. Wainhira rekoñesementu kona-ba diferensia entre rai komunidade/lisan no rai seluk ho direitu rai seluk importante, ne'e hanesan faze primeiru (tahap pertama) de'it. (Ministeriu Justisa proposta Kódigu Sivíl ne'ebé la rekoñese tomak rai komunidade.)

Maibe, ita presiza diskusaun públiku kle'an liu tan kona-ba oinsa rai komunidade/lisan bele liga ho sistema rai nasionál. Sé diskusaun ida ne'e la iha, direitu rai komunidade/lisan ignora tiha, tau iha sorin ho laiha planu atu responde kestaun sira ne'e ka deside husi ema uitoan de'it ne'ebé maka halo desizaun. Ida ne'e la fó fatin ba ema sira ne'ebé ukun rai komunidade no lisan atu hanoin no kontribui ba lei no politika sira ne'ebé afeta sira nia direitu fundamentál (Hare Lei ba Rai tranzitoriú.). Ita labele iha hanoin katak bele rezolve lalais kestaun hirak kona-ba rai komunidade no lisan. Maibe, ita presiza tebes planu klaru ba prosesu ida atu hahú diskusaun ida ne'ebé naruk no kle'an ho komunidade, iha ne'ebé ema sira ne'ebé kaer rai komunidade no lisan bele halo kontribuisaun kle'an ho informasaun no hatene didiak.

Haree ba oin?

Politika kona-ba rai nian sira sei iha impaktu boot, no sei fó impaktu ba seguransa ai-han, dezenvolvimentu ekonomia, meiu-ambiente, direitu feto nian no seitor barak seluk tan (Hare Kaixa Rai hanesan Sistema ida). Maibe iha kooperasaun uitoan de'it entre Ministeriu Justisa no departementu governu nian seluk, atu planeia no kordena aktividade sira atu hetan hanoin di'ak ba prosesu rai. Se Konsellu Ministru simu esbosu Lei ba Rai tranzitoriú, ida ne'e bele to'o iha Parlamentu karik antes fulan Julhu 2010. Maibe iha planu no preparasaun uitoan de'it atu realiza lei ida ne'ebé kle'an tebes ne'e. Aktividade ne'ebé presiza mak inklui ho edukasaun direitu rai nian, prosesu monitór/haree tuir, aumenta ajuda legal sira no para-legal, no ajuda ba ema sira ne'ebé hetan eviksaun husi sira nia fatin - liu-liu ba sira ne'ebé presiza rai ba sira nia nesesidade lor-loron.

Sosiedade Sivíl nia analiza no advokasia kona-ba asuntu rai mós sei fraku no dezenvolve hela. ONG barak, grupu komunidade sira, bisnis sira ne'ebé la buka lukru ba sira nia an no ema sira ne'ebé halo advokasia kona-ba justisa sira seidauk komprende oinsa prosesu rai ne'e sei afekta ba sira nia aktividade. Grupu hirak ne'e presiza atu haree sa mak sei bele halo atu ajuda ema hodi komprende sira nia direitu ba rai. Iha nasaun seluk iha ajuda ba direitu ba rai inklui lori kazu kona-ba rai nian ba tribunal, proteje vida moris ne'ebé mai liu husi rai, luta hasoru prosesu eviksaun ne'ebé la justu, no influensia esbosu lei sira. Importante mós atu ajuda ema atu hasees'an husi tusan ne'ebé haforsa sira atu fa'an sira nia rai; asegura katak sira hatene impaktu tomak husi akordu sira rai ne'ebé sira asina, no kria direitu rai komunidade no lisan nian ne'ebé forte.

Alem USAID, ajensia internasionál seluk envolve iha Timor-Leste nia politika rai nian. Asesor internasionál sira iha kooperasaun bilateral Governu Portugal ba Ministeriu Justisa mós iha knaar importante iha prosesu atu dezenvolve lei no estrutura kona-ba rai. Ministeriu Justisa husu Organizasaun Internasionál Migrasaun (IOM/OIM), no mós kompania legal husi Portugal, atu prepara esbosu dekretu lei kona-ba kompensasaun. Banku Mundial nia programa Justisa ba Kiak (Justice for the Poor) prepara hela atu fó konsellu politika kona-ba oinsa ema husi liur (la'os komunidade) bele uza rai komunidade no rai lisan. Liu husi konsellu ne'e Banku Mundial hein atu fasilita prosesu investimentu bisnis.

Rekomendasaun sira

La'o Hamutuk rekomenda katak la bele haree kona-ba rai rohan-rohan de'it, maibe tenke haree ba parte hotu. Ida ne'e inklui deside prinsipiu importante sira ne'ebé sai fundasaun ba sistema rai ida, no mós kooperasaun no planu boot liu. Desizaun sira kona-ba rai la'os buat ne'ebé hadia problema hotu. Desizaun sira kona-ba sistema rai tenke envolve ema barak. Sira tenke buka atu hetan solusaun di'ak liu ne'ebé bele aplika, ho hanoin katak kada ema iha sira nia istoria no situasaun diferente kona-ba rai.

Prosesu konsultasaun nasionál ida kona ba politika rai

Prosesu konsultasaun nasionál ida tenke:

• Hamósu diskusaun públiku no dada lia ne'ebé luan

• To'o nivel suku

• Envolve ema barak, inklui departementu governu nian sira, bisnis ki'ik sira, ONG sira, ema servisu iha universidade sira, ema kbiit-laek sira hanesan jovem, feto, veteranu no refugiadu sira, lianain no dato sira, ferik no katuas no ema husi foho no mós husi vila.

• Forma fundasaun ba foti desizaun kona-ba asuntu rai

• Deside prinsípiu matadalan nian

• Koalia kle'an kona-ba benefisiu sira no risku sira husi dalan oi-oin (hanesan kona-ba rai komunidade)

• Identifika estrutura/grupu ne'ebé iha kbiit atu kontinua desizaun sira ne'e husi konsultasaun. Ida ne'e bele inklui Konferensia Rai nian ida ka Komisaun Rai ida.

Hanoin ba oin

Governu no sosiedade sivíl tenke investe iha edukasaun no preparasaun ba nesesidade husi sistema rai foun ida. Governu tenke mós prepara atu harii instituisaun sira ne'ebé haree ba rai, hanesan Komisaun Rai ka Provedoria Rai atu halo monitór no fó rekomendasaun sira kona-ba sistema rai foun, no mós kria servisu asistensia ne'ebé ajuda públiku ho informasaun independente.

Lei ba Rai Tranzitoriú

Lei ba Rai tranzitoriú (Lei de Terras) mak lei ida ne'ebé atu responde kona-ba kestaun rai pasadu hodi rezolve konfuzaun agora kona-ba nain ba rai. Esbosu Lei ba Rai tranzitoriú sei kria estrutura ida atu deside sé mak iha rai saida iha Timor-Leste, no governu tuir mai sei uza informasaun deklarasaun rai sira atu hasai títulu rai nian. Lei ne'e mós iha impaktu sistema rai iha futuru hodi rekoñese tipu direitu sira atu uza no soi rai ne'ebé eziste. Lei ba Rai tranzitoriú mós nia objetivu atu estabelese prinsípiu jeral kona-ba kompensasaun, determina sé mak deside kazu disputa no lista prosesu duni sai (despeju/eviksaun) bazeia ba lei ida ne'e. Ita Nia Rai iha knaar importante iha preparasaun Lei ba Rai tranzitoriú ba Ministeriu Justisa.

Lei ba Rai Tranzitoriú ne'ebé la'o ho di'ak sei klarifika sé mak soi nain ba rai, no ajuda ema atu rezolve inseguransa kona-ba propriedade rai. Lei ne'ebé la hakerek ho di'ak bele kria konflitus foun no aumenta tan disputa rai sira ne'ebé eziste tiha ona.

Tipu nain ba rai no direitu uza rai

Esbosu Lei ba Rai tranzitoriú haree ba sé mak bele soi rai: individual sira, entidade legal sira (hanesan igreja, ONG no kompania) no rekoñese dalan rua husi rai Estadu, públiku no privadu. Ema estranjeiru iha direitu atu uza rai, maibe la'os atu soi rai.

Lei ba Rai tranzitoriú ne'e tenke kria tipu nain ba rai no direitu uza rai ne'ebé di'ak ba situasaun lokál. Nasaun sira seluk haree ba asuntu ne'e iha dalan sira diferente. Hanesan ezemplu, iha Mozambique, Estadu mesak de'it mak bele soi rai. Ida ne'e fó direitu ba parte seluk atu uza hanesan komunidade no kompania privadu. Iha Vanuatu, laiha nain ba rai privadu. Individual bele asesu rai liu husi komunidade, hanesan membru komunidade ka liu husi aluga. Iha Timor-Leste, iha diskusaun uitoan de'it kona-ba tipu nain ba rai ka direitu uza rai ne'ebé di'ak liu ba Timor-Leste. Wainhira nasaun barak, hanesan Portugal uza tipu husi kategoría nominadu iha Lei ba Rai tranzitoriú, nesesariamente, sira la refleta desizaun sira bazeia ba situasaun Timor-Leste nian. Grupu lei na'in ki'ik mak halo tiha ona desizaun fundamentál sira, la'os liu husi diskusaun nasionál ida.

Halo lei sira sai realidade

Lei mesak de'it ne'ebé dezenvolve ho di'ak la automatikamente bele lori mudansa positivu. Instituisaun sira no sistema suporta sira mós presiza atu asegura katak mudansa boot iha estrutura rai la halo ema kbiit-laek sira ba lakon sira nia direitu ba rai. Títulu rai ne'ebé seguru liu sei hasa'e rai nia folin no hasa'e ema nia hakarak atu hetan rai. Ida ne'e razaun tanba sa mak seguransa tenke iha nia fatin antes implementa Lei ba Rai Tranzitoriú.

Iha Dezembro 2009, Ministeriu Justisa finaliza hela esbosu Lei ba Rai tranzitoriú, depois ida ne'e, lei ne'e sei ba Konsellu Ministru.

Lei ne'e sei:

• Rekoñese tipu diferente sira husi direitu uza no nain ba rai ne'ebé eziste ba sidadaun Timor-Leste hanesan individual, grupu, entidade legal sira no estadu. Ida ne'e inklui: Títulu Indonesia no Portugues, posse, uzukapiaun espesial (kontinua posse ba rai ema seluk nian dezde 1998) no Rai Públiku.

• Kria estrutura ida atu deside sé mak hetan rai wainhira iha deklarasaun lejitima rua. Estrutura ida ne'e identifika deklarasaun sira ne'ebé eziste, husi forte liu to'o fraku liu. Wainhira iha deklarasaun rua ka liu ne'ebé iha direitu rekoñese ba rai ne'e (hare iha leten), estrutura ida ne'e determina sé mak hetan rai ne'e, sé mak simu kompensasaun no sé mak lae.

• Kria Komisaun Kadastrál ida ne'ebé kompostu husi ema na'in tolu atu deside disputa rai sira. (Ida ne'e hotu tiha, ema bele hili ba Tribunal).

• Haree ba prosesu despeju. Iha ne'ebé direitu nain ba rai ba ema ida la'os ema/grupu ne'ebé agora dadaun uza hela rai ne'e, sira iha loron 30 atu sai. Maibe karik uza ida ne'e hanesan sira nia familia nia uma no sira la iha aksesu ba uma seluk, sira bele hela to'o fulan 18.

• Identifika nesesidade ba dekretu-lei sira ba iha futuru kona-ba mekanismu atu fó kompensasaun, Komisaun Kadastral no ema ne'ebé okupa rai uluk abandonadu na'in husi ema estranjeiru. Lei Parlementar atu kria Fundu Propriedade ne'ebé uza ba kompensasaun no mós nesesidades seluk liga ho lei.

• Estabelese prinsipiu ba Fundu Propriedade, fundu maneja husi estadu atu fó kompensasaun ba rai ne'ebé lakon ba ema/grupu ida ne'ebé iha deklarasaun lejitima rua ka liu ba rai hanesan. Kompensasaun sei bazeia ba valor rai iha ne'ebé rai ne'e foti/transfere ba ema seluk. Estadu sei fó fundu barak liu no halo pagamentu inisiu. Ema ne'ebé hetan sira nia nain ba rai liu husi uzukapiaun espesial sei selu fila fali osan ba Governu. (Governu bele hili atu husik debe ida ne'e.)

• Mata dalan ba ema estranjeiru atu hetan rai wainhira lei inan Konstituisaun 2002 komesa halao. Artigu 54.4 Konstituisaun RDTL la permite ema la'os nasionálidade Timor atu iha rai. Mata dalan ida ne'e inklui fó asesu ba akordus rai ba igreja no lalika selu.

• Kria zona proteje ba area rai komunidade/rai lisan. Area ida ne'e bele inklui rai ne'ebé Estadu, individual ka komunidade iha nain. Estadu iha responsibilidade atu asegura katak ema husi liur (la'os komunidade) ne'ebé atu uza rai iha zona protejidu ne'e uza rai tuir dalan ne'ebé fó benefisiú ba komunidade, no di'ak ba meiu ambiente, kultura no ema no fó respeitu ba kostume moris lokál. Tenke halo konsultasaun ho komunidade antes ema husi liur bele uza rai iha zona protejidu komunidade nian.

• Kria direitu atu sai nain ba rai hanesan komunidade. Nain ba rai komunidade-nian rejistu rai uza naran ba komunidade, no rai ne'e maneja liu husi uza no estrutura lokál (hanesan lisan). La bele fa'an ka foti rai ida ne'e.

Rai komunidade

Durante tempu halo preparasaun esbosu Lei ba Rai tranzitoriu iha proposta diferente kona-ba rai komunidade/lisan nian ne'ebé halo di'ak liu tan. Maski esbosu uluk hatama komunidade iha tipu nain ba rai ne'ebé eziste tiha ona hanesan direitu ba rai privadu no rai estadu, ne'ebé tau komunidade iha pojisaun fraku, esbosu ikus kria direitu klaru no espesifiku ba komunidade atu sai nain ba rai. Maski esbosu lei ne'e kria protesaun ne'ebé di'ak no rekoñese katak komunidade ida-idak iha situasaun la hanesan, lei ne'e la klarifika oinsa komunidade iha lian legal, hanesan, sé mak "komunidade" no sé mak bele reprezenta "komunidade" iha desizaun kona-ba rai komunidade, pur ejemplu akordu fó aluga rai? Ba oin, presiza foti desizaun kona-ba kestaun sira hanesan ne'e, maibe desizaun sira ne'e tenke mai husi diskusaun publikú ne'ebé naruk, kle'an no envolve ema barak (inklui ema kbit-laek) no halo iha nivel lokál no mós nasionál.

Rekomendasaun: (Hare mós Rekomendasaun iha Justisa Rai)

Hahú prosesu governu tomak-nian atu planu no servisu hamutuk kona-ba asistensia no seguransa atu suporta prosesu implementasaun. Aprezenta politika no planu kona-ba prosesu implementa hamutuk esbosu Lei ba Rai wainhira hatama ba Parlamentu atu hein ninia aprovasaun.

• Fó tempu naton atu aplika aktividade hirak ne'e antes Lei ba Rai komesa efeitu.

• Governu tenke estabelese prosesu planu klaru ba prosesu iha governu no stakeholder sira seluk.

• Governu tenke halo planu sira ba prosesu naruk hamutuk komunidade sira atu lori deside futuru rai komunidade no lisan.

• Lei ba Rai tenke rekoñese katak sei iha tempu mamuk ne'ebé laiha lei ida no oferese protesaun temporariu to'o tempu ne'ebé iha ona desizaun hodi koresponde ba situasaun ne'e.

• Sosiedade sivíl no grupu sira seluk tenke analiza oinsa mudansa kona-ba rai sei afekta sira nia servisu.

• Ministeriu Justisa tenki traduz esbosu Kódigu Sivíl ba Tetum no halo konsultasaun públiku dala ida tan.

Konsultasaun publiku kona ba Lei ba Rai

Konsultasaun públiku ba dala uluk liu kona-ba esbosu Lei ba Rai hala'o entre Junho no Agustu 2009, no hanaruk to'o 1 Novembru. Tuir fali, esbosu hatama hanoin balu mai husi públiku, esplora liu tan asuntu rai komunidade no deklara ho klaru katak - ema ne'ebé la'os sidadaun Timor-Leste _ hanesan individual ka grupu labele sai nain ba rai. Maski prosesu ba konsultasaun públiku di'ak liu duke lei sira seluk, maibe lei ida ne'e, lei ida ne'ebé iha impaktu dook no ema barak seidauk hatene kona-ba lei ida ne'e.

Sosiedade Sivíl Rede ba Rai identifika frakeza balu iha konsultasaun:

• Informasaun la fó iha nivel suku no aldeia

• Loron orario ba enkontru troka beibeik, no dala ruma konfirma loron rua ka tolu antes.

• Maioria partisipante sira seidauk hatene kona-ba lei antes enkontru, no sira kesar katak tanba ne'e mak sira labele fó hanoin di'ak ka reprezenta komunidade nia hare.

• Feto uitoan de'it mak koalia.

• Barak liu husi enkontru sira ne'e fó lisensa oras ida de'it ba partisipantes sira atu koalia.

• Lian husi ema kbiit-laek sira hanesan feto faluk, veteranu, IDP no jovem sira la dun rona.

• Xefe Suku sira no Xefe Aldeia sira esplika katak sira responsabiliza ajuda atu halo mediasaun ba disputa rai, no se ema la hatene konaba esbosu lei ka fiar ba desizaun sira nian, ida ne'e sei kria problema sira.

• Informasaun balu fó husi Ita Nia Rai no Ministeriu Justisa kona-ba rai la dun loos.

• Konsultasaun la establese prinsipiu sira atu sai matadalan ba Timor-Leste nia rai no prosesu dezenvolvimentu ne'ebé sei presiza atu halo liu tan tanba seidauk iha diskusaun públiku ne'ebé luan kona-ba efeitu sira husi lei ida ne'e.

Nudar rezultadu, kestaun importante barak mak la explora didiak, hanesan:

• Sé mak iha direitu legal atu halo desizaun sira kona-ba ema li'ur uza rai komunidade no asina kontratu sira lori komunidade nia naran?

• Oinsa ita bele asegura katak ema iha foho bele asesu ba mediasaun ba disputa rai no asistensia sira seluk?

• Sé mak responsabiliza atu tau matan kona-ba prosesu Lei ba Rai tranzitoriú nian atu asegura katak prosesu ne'e la'o ho di'ak?

Timór-Leste nia partisipasaun iha asaun global hasoru mudansa klimátika

Hodi haforsa Timór-Leste nia partisipasaun iha asaun global hasoru mudansa klimátika, Grupu Servisu ba Mudansa Klimátika organiza enkontru Públiku ida iha loron 19 fulan Outubro 2009, iha Aula Asosiasaun HAK, Dili.

Sai narador ba enkontru públiku ne'e mak Dr. João Gonçalves (Ministru Ekonomia no Dezenvolvimentu), Expedito Belo (Program officer Unidade Redusaun Pobreza no Meiu-Ambiente PNUD - Timór-Leste), no Maximus Tahu (La'o Hamutuk _ Grupu Servisu Mudansa Klimátika). Partisipante enkontru ne'e mai husi ofisial governu nian, ajensia internasionál sira, estudantes, ONG no sira seluk.

 Ministru João Gonçalves esplika katak iha Konferensia Nasoins Unidas nian kona-ba Mudansa Klimátika nian iha Kopenhagen, Timór-Leste sei suporta mekanismu ida ne'ebé dudu atu nasaun sira ne'ebé estraga liu iklima fó suporta finanseiru no teknologia ba nasaun sira seluk ne'ebé hasoru impaktu ba sira nia hahalok. Timór-Leste defende atu halo de'it amendamentu ba Protokolu Kyoto, laos hamosu fali protokolu foun ida tanba protokolu foun presija nasaun sira ne'ebé envolve iha laran asina no ratifika molok ninia aplikasaun

Tuir Expedito Belo husi Programa Dezenvolvimentu Nasoins Unidas (PNUD), Nasoins Unidas nia apoiu ba programa mudansa klimátika iha Timór-Leste oras ne'e dadaun mak hanesan halo jestaun no suporta ba implementasaun Asaun ba Programa Adaptasaun Nasional (NAPA) no Komunikasaun Nasional ba Dahuluk ne'ebé hetan osan husi Global Environmental Facility (GEF). GEF hetan fiar nudar mekanismu finansial nian ba Konvensaun ONU nian ba Diversidade Biolojia nian no Konvensaun ONU nian ba Mudansa Klimátika. ONU mós halo jestaun ba fundu ki'ik seluk ba progama mudansa klimátika nian.

Maximus Tahu (La'o Hamutuk no Grupu Servisu ba Mudansa Klimátika) foka ba oinsa Timór-Leste bele kontribui ba asaun global hasoru mudansa klimátika. Nudar nasaun ida ne'ebé iha prosesu atu estabele infraestrutura no servisus barak Timór-Leste iha oportunidade bo'ot atu halao modelu dezenvolvimentu sustentavel ida ne'ebé la estraga klimátika. Maski Timór-Leste la hetan obrigasaun legal atu hatun nia emisaun, ita iha responsabilidade moral ida atu kontribui ba hadi'ak fali klima. Timór-Leste bele halo kontribuisaun bo'ot tebes hodi sai modelu dezenvolvimentu ne'ebé sustentavel ba nasaun sira seluk. Maximus mós husu ba Governu atu defende prinsipiu justisa klimátika nian iha Copenhagen, katak nasaun sira ne'ebé estraga liu ona klimátika tenki responsabiliza liu ba hadi'ak fali klimátika. Asaun hasoru mudansa klimátika tenki mós respeita povu indijena sira, valores kulturais lokal, direitus umanus, igualidade jeneru, valores demokrasia no biodiversidade.

Membru La'o Hamutuk nain rua partisipa iha konferensia mundial kona ba mudansa klimátika nian iha Kopenhagen, no ami sei halo relatoriu kona-ba informasaun ne'ebé sira hetan iha Buletin tuir mai.

Osan husi doador no fonte seluk iha Timór-Leste desde 1999

Entre tinan baluk 1999 to'o tinan baluk 2009, ajénsia bilateral no multilateral gasta ona maizumenus osan biliaun $5.2 EUA ba programa sira baTimór-Leste. Husi osan sira ne'e, iha de'it maizumenus umdezimu _ osan tokon $550 _ mak tama mai iha Timór-Leste nia ekonomia, hanesan hatudu iha kraik no iha pájina tuir mai.

Susar tebes atu hetan dadus ne'ebé konsistente, kompletu no lolos. Osan sira ne'e tama mai liu husi kanál barak, inkluindu fundu fidusiáriu, apoiu orsamental ba Governu RDTL, misaun sira Nasoins Unidas (ONU) nian, forsa militar estranjeiru sira no projeitu sira ne'ebé jere-rasik iha ajensia Governu nia laran no iha liur. Osan sira husi doador no ema ne'ebé simu ajudu la hanesan, no Governu la konsistente hodi halo relatoriu ba ajudus ne'ebé sira hetan durante tinan hirak neé nia laran. Minimu liu, 1/5 husi doasaun ne'ebé doador sira promete hela nunka realiza, no ezekusaun orsamentu/fundu nian baibain la to'o ba montante ne'ebé planu tiha ona. Maske nune'e, ami koko ona atu halo estimatizasaun lolos wainhira dadus la hanesan ka labele hetan.

Klaru, biliaun $5.2 ne'e osan bo'ot (hanesan mós ho osan ne'ebè Timór-Leste rai iha Fundu Petroleum ohin loron), ida husi montante ne'ebé as liu husi ajudus per kapita nian iha mundo. Karik hare kois de'it, hanoin ida katak doadores sira halo pagamentu "reparasaun" la ofisialmente ba sira nia involvimentu no sira nia matan-delek ba okupasaun ilegal Indonesia nian. Karik osan hirak ne'e bele fahe hanesan ba sidadaun Timór-Leste sira, kada ema ida sei hetan $1.48 ba kada loron ida, natoón atu suporta estilu moris sai uitoan husi linha kiak nian.

Infelizmente, iha de'it fraksaun ki'ik husi osan ne'e maka mai iha Timór-Leste hodi sirkula iha ita nia ekonomia lokal. Besik 90% husi osan sira neé maka gasta ona ba salariu ema internasionál, soldadu estranjeiru, aprovizionamento tasi balun halo importasaun, konsultador sira, administrasaun tasi balun, nsst. Ami estimatiza katak tokon $550 tama iha Timór-Leste. Wainhira atu distribui ba ita nia povu, ida ne'e sei sai 15 sentimus kada ema ida kada loron ida -- 1/6 husi ne'ebé estimatiza iha linha kiak.

Ekonomia Baziku

Durante tinan sanulu liu ba kotuk, Timór-Leste hetan biliaun $5.6 husi fa'an minarai no gas natureza nian, no mós tokon $287 husi investimentu Fundu Petroleum nian. desde independénsia iha Maiu 2002, Governu Timór-Leste gasta ona biliaun $1.1 husi rendimentu petroleum, no mós tokon $204 iha suporta orsamental nian husi doador sira no tokon $304 husi taxa domestiku no pagamentu sira.

Durante periodu ne'ebé hanesan, GDP naun-petroleum Timór-Leste nian hamutuk biliaun $3.5, menus rendimentu husi petroleum ka montante husi asistensia estranjeiru nian. GDP per kapita sa'e husi $316 iha tinan 1999 to'o $462 iha 2008, halo rekoperasaun ba numeru ne'ebé tu'un wainhira UNTAET sai no durante krize 2006.

Depois iha ona osan petroleum nian, despeza Governu nian sa'e maka'as. To'o iha 2005 tokon $70-$90 kada tinan, sa'e to'o besik tokon $120 kada tinan ida iha 2006 no 2007. durante 2008, Governu RDTL gasta tokon $480, no ekspeta katak sei gasta tokon $681 iha 2009. Dotasaun Orsamento Geral Estado 2010 nian menus (tokon $660), maske planu Governu nian atu hasai orsamento ne'e iha Orsamento Reaktifikativu nian ne'ebé dala ruma inklui ho imprestimus husi tasi balun nian. Ami preokupa katak imprestimus hirak neé sei la rezulta kresimentu ekonomia tempu naruk nian ne'ebé sufisiente hodi fo biban ba sira atu bele selu fila fali, liu-liu wainhira rendimentu minarai nian tun.

Nai ulun no peritus sira hateten katak Timór-Leste nia ekonomía domestika sa'e maka'as, dala barak sira haktuir estimatizasaun FMI (Fundu Monetaria Internasional) nian katak GDP naun-petroleum nian sa'e 12.8% entre 2007 no 2008. La'o Hamutuk hare ida ne'e ho diferente, hanesan ami esplika iha ami nia submisaun ba Parlamento Nasional kona ba Orsamento Geral Estado 2010. Durante 2008, despeza Governu nian sa'e tokon $300, maibe ekonomia naun-petroleum nian sa'e de'it tokon $100. iha linguajen seluk, parte ekonomia nian la injekta husi gastu bo'ot ne'ebé hamenus lukru estadu nian durante 2008.

Timór-Leste iha defisit merkado ida ne'ebé bo'ot, durante tinan lima ho balun hahu iha inisiu 2004, importasaun nasaun nian tokon $926 iha merkadoria, iha tempu ne'ebé hanesan esportasaun naun-petroleum nian hamutuk tokon $46. Ba tinan tolu liu ba, liu metade husi GDP naun-petroleum nian ne'ebé tama mai uza hodi selu importasaun. Durante tinan 2009, Timór-Leste importa tokon $283 sasan merkadoria nian, iha tempu ne'ebé hanesan esportasaun nian tokon $8 (98% husi esportasaun ne'e mai husi fa'an kafe).

Produsaun petroleum Timór-Leste nian no rendimentu husi kampu Bayu-Undan sa'e bo'ot ba biliaun $2.4 iha 2008, tun fali ba biliaun $1.6 iha 2009, biliaun $1.4 iha 2010 no sei tun ba zero iha 2024. Kampu Sunrise no kampu sira seluk sei fó nivel rendimentu ne'ebé hanesan ba tinan 25 tan. Totalmente, Timór-Leste bele hetan kuaze biliaun $35 husi rendimentu petroleum nian molok kampu mina rai sira ne'e maran iha jerasaun rua nia laran. Fahe ba ita nia populasaun ohin loron nian, besik $10,000 ba kada ema ida, ne'ebé bele ajuda hadia ita nia moris, maibe ne'e la sufisiente atu halo ita sai riku ka moris iha klase mediu.

Rendimentu hirak ne'e sei hotu durante jerasaun labarik sira ohin loron nian. Saida mak ita sei iha hela hodi bele troka rendimentu hirak ne'e?

Dependensia ba importasaun nian, orsamento ne'ebé sa'e maka'as, programa Governu nian ne'ebé laos-sustentavel no labele selu fali debe sai hanesan sintoma klasiku husi "malisan rekursu," ne'ebé osan tama mai ho fasil gasta lahoo planu ka hanoin ne'ebé barak. Maibe wainhira osan ne'e hotu tiha, kiak sei aumenta sa'e no karik ita la kuda ita nia hahan rasik, ita sei hamlaha.

Karik seitor seluk ekonomia nian la hamoris bo'ot no barak liu iha tinan 2024, povu sei mate. Asistensia doadores sira sei la salva ita husi ita nia vizaun ne'ebé fraku.

Justisa ba Timór-Leste Nafatin Nu'udar Obrigasaun Internasionál ida ne'ebé Seidauk Atínje

Indonézia nia invazaun no okupasaun ilegál iha Timór-Leste oho ema entre 100,000 too 200,000 entre tinan 1975 no 1999. Asembleia Jéral Nasoins Unidas kondena dalas ualu bà okupasaun militar ne'ebé brutal liu. Maibé, suporta forsa militar no polítiku husi nasaun Austrália, Estadus Unidus Amerika, Inglatera no nasaun sira seluk halo hahalok ida ne'e akontese hela. Hanesan hakerek ona iha relatóriu Chega!, ne'ebé koalia mós kona-ba krime graves kontra umanidade, krime funu no krime sira seluk ne'ebé kontra juridisaun universal.

Tinan sanulu ona hafoin Timór oan sira ho laran barani no hakmatek vota ba independénsia, persistensia impunidade ba krime sira ne'e kontinua hatauk no kria problema barak ba nasaun ne'e nia futuru. Laiha kriminozu boot ida mak lori ona ba tribunál, no modelu "ema boot" sira ne'ebé la ba hatan krime sira ne'ebé sira halo ba sosiedade Timór-Leste, nune'e dala barak hamosu violensia no haburas odiu vingansa no enkoraza ekspetasaun ba impunidade.

Esforsu atu hametin relasaun ho lideransa sira Indonézia nian prevene ona povo Indonézia no Timór-Leste hodi hatene no hetan konkordansia konaba krime sira ne'ebé komete ho sira nia naran no kontra sira nia familia. Esforsu ne'e impede dezenvolvimentu direitus umanus nian no demokrasia iha Indonézia no taka vitima Timór oan sira hodi rezolve sira nia trauma no la'o ba oin ho sira nia moris.

Tuir mai, ida ne'e halo lideransa ONU no membru estadu balun sai oin rua. Sira repete bebeik hateten ba povo katak sira sei la fó dalan ba impunidade atu moris, maibe failha hodi implementa mekanismu ne'ebé efetivu hodi hetan justisa. Ezemplu promesa lideransa sira ne'e la hetan kontinuasaun ho asaun ne'ebé estraga ita nia demokrasia foun ne'e.

Valoriza pasadu

Iha Outubru 1975, soldadu Indonézia sira oho jurnalista sira nain lima ne'ebé servisu ba media Austrália, no hafoin fulan rua ikus-mai soldadu sira oho tan nain ida tan hamutuk ho ema sivil Timór-oan rihun ba rihun. Krime sira ne'e marka hahu ¼ sekulu hahalok aat nian, oho ema, anarkia, masakre no violasaun ba direitu ema-nian sira seluk ne'ebé hodi reforsa okupasaun ilegál militar estranjeiru nian. Laiha ulun-boot ida husi militar ka politiku nain ne'ebé mak dezenha no fó ordem ba krime sira ne'e lori ona ba hodi responsabiliza, no barak mak kontinua kaer pozisaun poder nian dadaun no iha influensia iha Indonézia no fatin-sira seluk.

Iha fulan Abril 1999, komunidade internasionál hakfodak ho masakre ne'ebé halo ho brutal tebes iha igreja Likisá no Manuel Carrascalão nia uma iha Dili. Maske militar Indonézia oho ona ema-rihun ba rihun durante iha tinan 23 nia laran, ne'ebé sasin hela husi ema estranjeiru sira ne'ebé mak mai Timór-Leste atu prepara ba referendum ne'ebé atu mai. Hahalok aat sira ne'e hanesan parte husi kampaña teror ne'ebé sistematiku, violensia no intimidasaun husi militar Indonézia no milisia ne'ebé sira komanda, ne'ebé intende atu taka no prevene votasaun.

Krime hasoru umanidade sira ne'ebé halo iha Timór-Leste entre 1975 no 1999 direitamente viola rezolusaun Konseillu Seguransa ONU no Asembleia Jéral nian. Krime sira ne'ebé halo hafoin Maiu 1999 mós kontra akordu Nasoins Unidas ne'ebé fó responsabilidade seguransa tomak ba Polísia Indonézia nian durante referendum. Nasoins Unidas nia ema sira mós iha entre vitima sira, maibé ema hotu-hotu iha obrigasaun ida atu halo prosekusaun ba hahalok aat sira ne'e hodi asegura katak hahalok sira ne'e sei la mosu tan.

Tribunál Krime Internasionál nian laiha juridisaun ba krime sira ne'ebé halo molok tribunál ida ne'e hari iha 2002. Karik Tribunál Krime Internasionál harii tiha antes, konserteza ulun bo'ot Indonézia sira bele hetan ona kastigu. Maibé ne'e laiha dauk, entaun Nasoins Unidas no komunidade internasionál iha obrigasaun ida ba povo Timór-Leste, no ba umanidade, atu kria mekanizmu ida ne'ebé hodi bele hetan justisa.

Saida mak halo ona to'o ohin loron?

Hafoin Indonézia sira sai husi Timór-Leste iha 1999, Nasoins Unidas estabelese Komisaun Inkeritu ida, no iha tempu ne'ebé hanesan Indonézia estabelese Komisaun ba Violasaun Direitus Humanus iha Timór-Leste (KPP-HAM) iha 2000, Komisaun ONU no KPP-HAM rekomenda katak tribunál internasionál sei estabele wainhira esforsu husi Indonézia, Nasoins Unidas, no Timór-Leste nian failha atu hakotu impunidade. Depois liu tiha dekade ida, impunidade nafatin iha no nia konsekuensia hatudu momós hela. Iha kraik esplikasaun ida kona-ba mekanismu sira durante ne'e, laiha ida husi mekanismu sira ne'e maka garantia akuntabilidade.

Prosesu Krime Graves UNTAET/RDTL

Konsellu Seguransa Nasoins Unidas estabelese Unidade Krime Graves no Painél Spesiál iha Timór-Leste iha 2000. Koletivamente konhesidu hanesan prosesu krime graves, Unidade Krime Graves no Painél Spesiál sai hanesan klibur ida entre Timór-Leste-ONU hafoin ukun-rasik-an iha 2002. Unidade Krime Graves fó akuzasaun ba ema nain 391, inkluindu eis chefe militar Indonézia nian Jeneral Wiranto, maibé lori de'it ema nain 87 ba julgamentu, iha 84 mak hetan akuzasaun. Liu 75% husi ema sira ne'e hetan ona akuzasaun, inkluindu ba sira tomak ne'ebé la'os ema Timór, moris livre hela iha Indonézia, balun sai-ulun boot iha neba. ONU no Timór-Leste fó sai ona mandatu kapturasaun nian ba akuzadu nain 303 ne'ebé barak mak seidauk kaer.

Wainhira prosesu Unidade Krime Graves nian konkluidu iha 20 Maiu 2005, identifika kazu oho nian hamutuk 469 husi 1999 ne'ebé seidauk hetan investigasaun hotu. Material sira husi prosesu Krime Graves nian arkivu hela iha Nova Yorke no Timór-Leste. Durante 2007 no 2008, Prezidente Jose Ramòs-Horta husik livre ema barak ne'ebé hetan akuzasaun husi Painél Spesiál, utiliza nia poder Presidensial nian atu oferese klemensia no hamenus sentensa nian. Iha de'it ema ida husi akuzadu kriminal nain 84 mak agora dadaun iha prizaun.

Iha Agostu 2009, Polisia Nasionál Timór-Leste kaptura Maternus Bere ne'ebé hetan alegasaun ba oho ema barak, depois nia mai hakat liu fronteira husi Indonézia. Bere, lider milisia ida ne'ebé hetan ona akuzasaun husi Unidade Krime Graves nian ba masakre Setembru 1999 iha Igreza Suai, nudar julgamentu ne'ebé pendente ba ema ne'ebé la hetan prizaun. Maibe, Indonézia fó presaun ne'ebé obriga ba lideransa Timór-Leste nian atu ilegálmente husik nia fila hodi hetan liberdade tomak iha Indonézia. Erozaun ida ne'ebé perigozu tebes ba justisa, akuntabilidade no regra konstitusional lei nian. (Hare editorial iha kraik).

Tribunál Direitus Umanus "Ad hoc" Indonézia

Indonézia harii nia Tribunál Ad-Hoc Direitus Umanus nian kona-ba Timór-Leste atu rejeita ezijensia ba harii tribunál internasionál. Julgamentu hahú iha Jakarta iha 2002. Prosesu ne'e denunsia momos hanesan teatru ida de'it. Ema nain 18 ne'ebé akuza ona tamba failha hodi prevene krime kontra umanidade iha Timór-Leste durante 1999 (duke akuza tanba fó ordem atu halo krime hirak ne'e), ho laiha atensaun ba okupasaun uluk iha tinan 23. Ema nain 12 ne'ebé kondena ona iha julgamentu primeiru, no kondenadu nain ne'en ne'ebé husik tiha ona husi Tribunál Rekursu Indonézia nian. Komandante Milisia Eurico Guterres, ema sivil Timór-Leste ida, ne'ebé mak hetan livre ikus liu; nia mós kandidata an ba Parlamento iha elisaun Indonézia nian foin lalais ne'e.

Komisaun Peritus ONU

Iha Fevereiru 2005, Kofi Annan hili Komisaun Peritus atu evalua prosesu judisial sira ne'ebé la'o hela dadaun no halo proposta ba pasu tuir mai hodi hetan akuntabilidade ba sira hirak ne'ebé responsabiliza ba krime graves iha Timór-Leste iha 1999, membru ONU sira laiha vontade polítika atu hare ba krime sira foin dadauk ne'e. Komisaun Peritus hato'o relatoriu iha Maiu 2005, no Konsellu Seguransa husu ba Sekretariu Jéral halo rekomendasaun ne'ebé "pratikamente viavel" ne'ebé nia halo ona iha tinan ida depois.

Komisaun peritus hetan katak Tribunál Ad-Hoc ba Direitus umanus nian iha Indonézia "manifesta-an la adekuadu," hatudu "valor oituan de'it ba ka hatur an ba standar internasionál ne'ebé relevante." Relatoriu ne'e hateten katak ONU ne'ebé suporta prosesu Unidade Krime Graves no Painél Spesiál labele hetan "akuntabilidade ida ne'ebé di'ak," maibe observa katak prosesu ne'e la la'o di'ak tanba rekursu ne'ebé la natoon, suporta ne'ebé la sufisiente husi governu Timór-Leste, no ladun iha kooperasaun husi Indonézia.

Komisaun Peritus rekomenda atu fó tempu fulan ne'en ba governu Indonézia atu hatudu katak sira seriu atu halo julgamentu ba ema boot sira ne'ebé halo krime. Karik Indonézia failha atu halo ne'e, Komisaun Peritus ezije ba Konseillu Seguransa atu konsidera hodi estabelese Tribunál Krime Internasionál ida. Komisaun Peritus mós rekomenda katak ONU hamoris fila fali Unidade Krime Graves no Painél Spesiál ba Krime Graves temporariamente atu halo jestaun rekursu no proteje dokumentu sira kazu nian, ho stratejia klaru ida hodi entrega sira-nia funsaun ba instituisaun lokal sira.

Iha Julhu 2006, Sekretariu Jéral ONU nian responde ba relatoriu Komisaun Peritus hodi rekomenda hari fila fali institusaun internasionál ne'ebé suporta ba investigasaun no akuzasaun husi krime graves ne'ebé akontese iha 1999, maibe la hamoris fila fali komponente prokuradorial Unidade Krime Graves nian.

Ekipa Investigasaun Krime Graves UNMIT nian

Konseillu Seguransa fó mandatu ba UNMIT atu ajuda hodi finaliza investigasaun ba krime graves tomak ne'ebé akontese iha 1999 ( maibe la'os krime sira molok 1999), maibe la fó autoridade atu halo akuzasaun ka hala'o julgamentu. Sistema justisa Timór-Leste nian mak responsabiliza ba akuzasaun, prosekusaun no julgamentu sira, inklui autor alegadu kriminozu sira ne'ebé molok ne'e hetan tiha ona akuzasaun husi Unidade Krime Graves. To'o ohin loron, Ekipa Investigasaun Krime Graves UNMIT nian kompleta ona kuaze investigasaun 100 ba iha kazu 396 ne'ebé seidauk rezolvidu, hatama ona relatoriu ba iha Prokurador Jéral hodi hetan konsiderasaun. Ho kazu kuaze 5,000 ne'ebé sei pendente iha Prokuradoria Jéral no laiha vontade polítika iha Dili hodi lori kazu hirak ne'e ba iha tribunál, prosesu ida ne'e nudar promesa seluk tan ne'ebé mamuk.

Komisaun Simu Malu, Lia Los No Rekonsiliasaun Timór-Leste (CAVR)

Orgaun Independente ida ne'ebé kria tiha no halao nia servisu ho suporta husi Nasoins Unidas, Komisaun Simu Malu, Lia Los No Rekonsiliasaun (CAVR) produz ona dokumentasaun ne'ebé detaillu liu to'o ohin loron husi periodu 1974 too 1999 iha Timór-Leste, kobre okupasaun Indonézia tomak. Iha pajína 2,500 husi relatoriu final Chega! (lian Portuguese ba Natoon Ona!), ezije atu aumenta atensaun ba krime sira ne'ebé halo ona molok 1999 (ne'ebé inklui 99% oho-ema).

Relatoriu ne'e kritika maka'as ba involvementu husi komunidade internasionál ne'ebé suporta okupasaun no invazaun Indonézia nian ba Timór-Leste, no bolu ba Governu hirak ne'e no ONU atu diskute relatoriu ne'e ho hanoin hodi aprende lisaun sira husi invazaun no okupasaun nian. CAVR rekomenda katak Konseillu Seguransa ONU nian "hodi prepara an atu institui Tribunál Internasionál ida tuir Kapitulu VII husi Statutu ONU (UN Charter) nian, karik sasukat seluk ne'ebé sai konsideradu hetan failha hodi hetan justisa ne'ebé sufisente no Indonézia nafatin taka dalan ba justisa." Chega! mós rekomenda atu sira husu deskulpa no reparasaun husi Governu Indonézia, Estadus Unidos, Inglaterra, Australia no sira seluk, hanesan mós husi kompania ne'ebé halo kilat nasaun osidental sira nian ne'ebé suporta ba asaun Indonézia nian.

Komisaun Verdade no Amizade (CVA) Indonézia/Timór-Leste

Iha 2004, Prezidente nasaun Indonézia no Timór-Leste proposta ona Komisaun Verdade no Amizade nasaun rua nian ida hanesan esforsu ida ne'ebé atu la fó korajen ba Sekretáriu-Jéral ONU nian hodi hili Komisaun Peritus. CVA hetan mandatu atu estabelese "fahe dadus istóriku" ida husi violasaun direitus umanus molok no hafoin referendum Timór- Leste 1999. Ida ne'e bele rekomenda amnestia no proposta esforsu rekonsiliasaun husi-ema-ba-ema. CVA sei rekomenda amnestia no proposta esforsu rekonsiliasaun povo ba povo. Maibé, CVA la rekomenda prosekusaun ka sasukat judisial sira seluk, no laiha kbiit atu halibur testemunha ka kooperasaun nian.

Komisaun Peritus ONU nian hetan katak termu referensia CVA nian iha kontradiksaun ho lei rai laran no lei internasionál nian, no inklui laiha mekanismu atu hatan ba krime graves. Komisaun Peritus rekomenda katak Governu halo revizaun ba termu referensia nudar prekondisaun ida atu hetan suporta internasionál nian. Wainhira rekomendasaun ida ne'e ignora tiha, ONU deside atu la partisipa ka fó sasin ba prosesu CVA nian.

Iha Jullu 2008, CVA fó nia relatóriu ba Prezidente Timór-Leste no Indonézia, no fó sai lalais ba públiku depois ida ne'e. Ho mandatu ida ne'ebé limitadu tebes, relatóriu ne'e di'ak liu duke buat ne'ebé mak expekta ba: CVA la rekomenda amnestia (tamba laiha kriminozu alegadu ida mak koopera tomak), no hetan katak governu Indonézia iha responsabilidade institusionál ba krime sira ne'ebé halo tiha ona iha Timór-Leste.

Rekonsiliasaun hafoin-krize

Desde krize 2006, rekonsiliasaun hafoin-krize ne'e sai ona moda ikus nian atu hatan ba konflitu, trauma no salan husi krime violensia pasadu nian ho dialogu, sorumutuk komunidade, nasionál no dalan sira seluk ne'ebé fó biban ba ema hodi hatoo sira-nia laran kanek no lamentasaun, ne'ebé tuir-mai liu husi buat ruma hanesan "rekonsiliasaun." Maske ne'e favorese hodi ba hakotu konflitu lokal no hatan krime kiik sira, maibé sira haluhan tiha fundamental lolos husi krime kontra umanidade iha tinan 1975 too 1999: ne'ebé mak halo husi governu rai-liur ne'ebé ilegálmente invade no brutalmente okupa Timór-Leste. Indonézia hahú iha mudansa di'ak hafoin hapara tempu ditadura Suharto, maibé Indonézia nia governu nafatin defende kriminozu sira husi justisa, halo imposivel ka taka dalan ba buka lia-loos.

Maske Prezidente Timór-Leste no sira-seluk lakohi atu loke fali kanek sira ne'ebé halo tiha ona iha pasadu, Timór-oan barak tebes hetan ona terus husi traumatiku frustrasaun pasadu sira ne'ebé subar-metin, foin mak hamósu iha meius ne'ebé la prediktavél. Too laran kanek no hirus sira ne'e hasai tiha, sira sei la bele moris hanesan normal no moris hakmatek.

Husi ne'e atu ba iha ne'ebé?

Balun iha Dili lakon ona motivasaun tanba presistensia instusional no politika ne'ebe la simu justisa lolos, no hahú ona atu simu "justisa tranzisional," ka "rezolusaun konflitu." Sente pesimistiku ba komitmentu governu nian atu kaer sira nia promesa, sira suporta projeitu tempu badak nian sira hanesan "reparasaun" ba vitima ka debates parlamentar nian kona-ba rekomendasaun Chega! nian. "Reparasaun" lolos la'os de'it atu hatun vitima sira nia moris kiak ka fo kompensasaun ba sira nia terus, maibe inklui loke dalan ba responsabilidade no pagamentu husi kriminozu sira, nudar formatu ida husi justisa restorativu nian.

Maske justisa tranzisional ne'e sei fó benefisiu, sira sei la responde impaktu ne'ebé la'o dadaun husi impunidade, akuntabilidade husi kriminozu sira, trauma vitima sira nian ka responsabilidade komunidade internasionál nian. Maske ne'e sei han tempu, maibe La'o Hamutuk kontinua suporta mehi ne'ebé hato'o iha Abril 2009 husi sobrevivente masakre iha Manuel Carrascalão nia uma tinan 10 liu ba:

• Kriminozu sira hotu ne'ebé komete krime graves kontra umanidade tenke lori ba tribunál.

• Kriminozu sira tenke hetan ekstradisaun no sira tenke hataan ba krime ne'ebé sira komete.

• Harii Tribunál Internasionál independente ida ba violasaun direitus umanus nian iha Timór-Leste.

Iha Abril 2009 Sobrevivente Likisá Hatoo Petisaun Ba Sira-Nia Ulun Boot Sira

Tinan 10 koalia kona ba justisa iha Konsellu Seguransa ONU

Artigu ida ne'e hanesan analiza La'o Hamutuk nian kona ba liafuan Konsellu Seguransa uza durante sira nia debate no resoluzaun kona ba Timor-Leste durante tinan sanulu. Ami fo sa'e artigu ida ne'e iha Loron Direitus Humanus, 2009. Liga iha ne'e atu le'e.

Grafika ne'e hatudu saida mak hateten iha enkontru loron 23 Outubru 2009. Letra nia boot no kiik indika liafuan ne'e hateten sai dala hira.

La'o Hamutuk hakerek karta ba Konsellu Seguransa nian. Ida ne'e karta nia versaun badak liu.

Editorial: Rejeita Impunidade, La'o ba Justisa

Tinan sanulu liu ba, militár Indonézia hapara oho, tortura no obriga hamlaha ba povu iha Timor-Leste, no hahu husi ne'ebá povu iha ne'e relativamente moris iha dame, independensia no governu rasik nia laran. Iha dekada ida nia laran, ita servisu atu kria Konstituisaun, dezenvolve ukun lei nian, halo estatutu, estabelese tribunais, hadiak kapasidade no hametin orgaun sira husi ita nia estadu demokrátiku.

Ita halo ona progresu. Susar atu halo tranzisaun husi funu ba dame, husi okupasaun ba independensia, husi ditadura ba demokrasia, husi rezistensia ba harii koligasaun. Ita sei iha dalan naruk atu liu.

Le'et entre prinsipiu no prátika karik luan liu bainhira koalia kona-ba akuntabilidade ba krime hasoru umanidade. Hanesan deskreve iha artigu seluk iha Buletin ida ne'e (haree iha leten) responsabilidade instituisaun -- Nasoins Unidas no estadu Timor-Leste no Indonezia -- falla atu hakotu impunidade ba krime rihun ba rihun ne'ebé halo kontra umanidade ne'ebé dirije husi ulun bo'ot Indonesia nian husi 1975-1999. Sira la rona halerik husi ema Timor sira ne'ebé sei moris hela ba justisa, la rona vítima Indonezia sira ba violasaun ne'ebé akontese hela, la rona aktivista direitus umanus iha mundu tomak. Sira falla atu la'o tuir komitmentu mundial nian hafoin jenosidiu "Holocaust" Nazi ba "Labele tan" husik krime kontra umanidade la hetan sentensa.

Iha nasaun barak, atu hetan justisa sei lori dekada, maibe ne'e mosu duni. Ditador Augusto Pinochet (Chile) no Slobodan Milosevic (Serbia) mate iha prizaun, no Alberto Fujimori (Peru) halao nia sentensa tinan 25 iha prizaun. Iha Argentina, iha ne'ebé "funu foer" iha tinan 1970 oho ema rihun ba rihun, tortura no ikus liu hetan estradisaun no lori ba julgamentu.

Justisa so bele sai realidade ida bainhira ita hotu - vítima, sobreviventes, família ne'ebé lakon ema ne'ebé sira hadomi, povu ne'ebé terus tanba opresaun, sidadaun ne'ebé konsiente iha mundu tomak - luta ba ne'e. Luta ne'e kontinua hela iha Timor-Leste, no La'o Hamutuk espera katak sira nia hakilar sei moris naruk no maka'as liu tan too ema rona, too sira bele konsege tuir ka manan hasoru ema sira ne'ebé sakrifika akuntabilidade tempu naruk ba benefisiu pesoal, politíka ka ba benefisiu diplomatíku nian ba tempu badak. Hakotu impunidade bele lori tinan barak, maibe bele atinji.

Libertasaun ba ohodór Maternus Bere iha tinan kotuk hatudu katak impunidade sei moris buras iha Indonezia no Timor-Leste. Maibe, hakilar ba nia libertasaun hatudu katak hamrook ba justisa mós maka'as hela.

Durante 1999, Bere nu'udar Komandante Milisia Laksaur ne'ebé halo tauk povu distritu Kovalima, oho ema sivil ne'ebé lahoo kilat liu nain 40 (inklui padre nain 3) iha Igreja Suai iha loron 6 Setembru 1999. Iha Fevereiru 2003 Unidade Krime Graves ONU/RDTL akuza Bere no sira seluk ba "krime kontra umanidade: oho, esterminasaun, halakon ema ho forsa, tortura, aktus laos umanus, violasaun seksual, deportasaun no persegisaun." Juiz Timor-Leste hasai mandatu kapturasaun, ne'ebé haruka ba Indonezia no sirkula internasionalmente husi Interpol. Bere moris ho livre iha Timor-Osidental, nia ema ida husi akuzadu nain 300 ne'ebé Indonezia fo protesaun hela.

Iha Agustu 2009, autoridade Timor-Leste fo viza ba Maternus Bere, maibe bainhira nia tama iha nasaun ne'e, rezidente Suai koñese nia. Polisia Nasionál Timor-Leste kaer nia iha loron 8 Agustu, no muda nia ba prizaun Becora hodi hein ba prosesu julgamentu.

Iha loron 30 Agustu, Timor-Leste selebra aniversáriu referendu independénsia nian ba tinan 10, maibe Ministru Negosiu Estranjeiru Indonezia nian rejeita atu partisipa iha komemorasaun ne'e wainhira Bere nafatin iha prizaun. Iha dader ne'e kedas, Primeiru Ministru Xanana Gusmão ilegalmente fó ordem ba autoridade prizaun atu husik Maternus Bere ba Embaixador Indonezia nian ba Timor-Leste. Depois fulan rua iha rezidensia Ambasador, Autoridade Timor-Leste fo protesaun ba Bere ba Indonezia, iha ne'ebé nia sai nu'udar ema livre ida.

Desizaun Prezidente no Primeiru Ministru RDTL atu halo tuir Indonesia nia hakarak hodi husik Bere, viola lei Timor-Leste nia Konstituisaun, soberania nasional no tratadu direitu umanus internasional ne'ebé Timor-Leste asina. Juiz de'it mak bele halo ordem legal hodi husik livre ema kriminozu ida husi prizaun, no laiha juiz ida ne'ebé hasai ordem ne'e. Tuir separasaun poder nian, sistema judisial hetan protesaun husi vontade politíka lider sira, hodi nune'e sei bele aplika lei ho imparsialidade.

UNMIT no Sekretariu Jeral ONU hatoo nia deskontente ho libertasaun Bere, no Komisariu Altu ONU ba Direitu Umanus hakerek ba Prezidente José Ramos-Horta ho nia "preokupasaun boot" katak desizaun hodi husik Maternus Bere "estremamente halo triste tanba iha konsekuensia boot ba futuru akuntabilidade ba krime seriu…." Hanesan iha pasadu, ONU falla atu foti aksaun.

Membru Parlamentu protesta, hanesan mos Prezidente Tribunal Rekursu, sidadaun Timor-Leste, organizasaun direitus umanus sira. Jornalista lokal no internasional no ideia lideransa sira nian fo sai hodi denunsia impunidade bo'ot ba tinan 25 ne'ebé Indonezia lidera Krime Kontra Umanidade iha Timor-Leste.

Iha fulan Setembru nia klaran, membru Parlamentu introduz Mosaun Sensura ne'ebé konklui: "la'os Tribunal ida maka fo'o ordem hasai Sr. Bere, entaun se'e maka disidi hasai Sr. Bere ne'e illegal, ne'e viola ita nia Konstituisaun, Kodigu Penal no Prosesu Penal RDTL nian. Bainhira Governu ida halo aktu nebe la respeita Parlamentu, la respeita Tribunal, viola Konstituisaun no viola Lei nebe vigora iha ita nia rain, Governu ne'e la iha ona kondisaun atu dirizi destinu nasaun nian, tamba ne'e merese ita nia sensura."

Parlamentu debate mosaun liu oras sanulu iha 12 Outobru. Primeiru Ministru Xanana Gusmão foti responsabilidade atu husik Bere, hodi aserta katak nia interpretasaun ba interesa nasional importante liu fali Konstituisaun. Debate animadu ne'e hetan transimisaun direkta iha televizaun. Iha kalan, Parlamentu vota tuir liña partidu hodi suporta Primeiru Ministru, ho 25 a favor ba sensura no 39 kontra.

Hafoin Bere husik fila fali ba Indonesia iha Outobru nia rohan, portavos iha Nova-Yorke ba Sekretariu Jeral esplika: "Nasoins Unidas nia pozisaun katak iha ne'ebá la bele iha impunidade, liu-liu bá krime graves inklui krime kontra umanidade, krime funu no jenosida, hanesan ema hotu hatene…Sekretariu Jeral espera katak governu Timor-Leste no Indonesia sei garante katak Maternus Bere sei lori ba Justisa."

Eventu ne'ebé haleu libertasaun ohodor ema barak ne'e hatudu katak Timor-Leste nia demokrasia seidauk estavel iha lei nia okos. Ita iha faze ida ne'ebé politíka bele diriji fali ita nia konstituisaun, iha ne'ebé viziñu ida bele lori ita nia estadu viola fali nia prinsipiu fundamental, iha ne'ebé lider sira bele implementa sira nia hanoin pesoal la haree fali strutura lei no nia prosesu. Lider balun konkorda atu halo rende Timor-Leste nia independénsia, iha ne'ebé ema barak sakrifika buat hotu, ba hakarak no ameasa Indonezia nian.

Maski nune'e, debate ne'e sai lisaun boot ida ba importansia ukun lei nian no defende Konstituisaun. Aliansa Nasionál ba Tribunal Internasional (ANTI) reenerjia fali, halo Konferensia Solidariedade Internasional iha ne'e iha fulan Augustu, hametin rede ho sidadaun Indonesia no nasaun sira seluk atu ejiji akuntabilidade. Ema sira ne'ebé halo advokasia ba justisa hetan lisaun foun katak, sé husik de'it ba sira, politika nain sira husi Timor-Leste, Indonezia no internasionál sei la implementa direitu povu nian ba justisa.

Luta seidauk remata. Iha fulan hirak foin lalais, Timor-Leste haree tiha ona dalan ne'ebé seidauk estabelese didiak atu rezolve problema ho "forsa seguransa" ka "reforma setor seguransa," hanesan fali soldadu no polisia armadu sira bele uza forsa atu intimida povu atu haluha sira nia protesta lahoo prinsipiu legal ne'ebé konsistente no protesaun direitus umanus ne'ebé Konstituisaun no sistema judisial promete.

Seguransa lolos - sidadaun sira bele moris lahoo tauk ba violensia, hamlaha, analfabetu, krime no moras - troka fali ho iluzaun seguransa liu husi intimidasaun. Justisa sosial lolos mai husi inklusividade: respeitu direitu sidadaun hotu-hotu nian ba direitus umanus, poder demokratiku, no asesu hanesan ba rekursu no servisus. Seguransa lolos nunka bele atinji liu husi halo opresaun hirus nian, halo izola, halokiak no marjinaliza povu atu tauk.

Maski violasaun direitus umanus iha Timor-Leste ohin loron la todan hanesan tempu okupasaun Indonezia, aprosimasaun ne'e inkonfortavelmente fo hanoin fila fali tempu Suharto nian. Durante tinan 24, forsa militar no polisia nunka konsege seguransa ba povu Timor-Leste, no sira labele halo ohin loron. La'o Hamutuk ejiji sidadaun Timor-Leste no sira seluk ne'ebé preokupa ba nasaun ne'e atu koalia no foti asaun hasoru modelu impunidade no ukun ho forsa. Ami sente la kontenti ho le'et ne'ebé aumenta ba beibeik entre ema riku no kiak, entre familia lubuk kiik ida ne'ebe iha poder maka'as no povu maioria sidadaun Timor-Leste.

Iha inisiu fulan Fevereiru, hanesan ONU diskute atu halo revizaun ba mandatu UNMIT, Aliansi Nasional ba Tribunal Internasional hakerek ba Konsellu Seguransa. ANTI ejiji katak UNMIT hahu prosesu hari Tribunal Internasional, investiga krime boot sira molok 1999, no publika akuzasaun formal sira. Maski ida ne'e pasu kiik ida de'it, sira sei nakfilak momentum ba impunidade ne'ebé moris ona iha dekada hirak liu dadaun, no hahu muda ba diresaun akuntabilidade no justisa nian.

Mai servisu ho La'o Hamutuk

La'o Hamutuk organizasaun sosiedade sivil Timor-Leste nian ida nebe halo monitor, analiza no relatoriu kona ba instituisaun prinsipal sira iha Timor-Leste nebe iha relasaun ba dezenvolvimentu fíziku, ekonomia no sosial Timor-Leste nian. La'o Hamutuk fiar katak prosesu ida nee tenki demokratiku, partisipativu, transparente no akuntabel.

La'o Hamutuk loke vaga servisu ba peskizador iha area tolu:

• Rekursus Naturais, liu-liu petroleu
• Governasaun no Demokrasia, inklui justisa
• Ekonomia no Merkado, inklui orsamentu estadu, imprestimu no komersiu internasional

 Se ita boot interese, bele hili  ligasaun ida ne'e atu hetan vaga servisu ka email info@laohamutuk.org ka bolu +670-3325013.

Sé mak La'o Hamutuk?

Staff La'o Hamutuk nian: Juvinal Dias, Mariano Ferreira, Shona Hawkes, Inês Martins, Odete Moniz, Charles Scheiner, Viriato Seac, Maximus Tahu

Tradusaun ba Bulletin ida ne'e: Guteriano Neves, Nuno Rodrigues

Orgaun Konsellu: Selma Hayati, Joseph Nevins, Pamela Sexton, Adérito de Jesus Soares (la ativo), Justino da Silva, Oscar da Silva

Saida mak La’o Hamutuk?

La'o Hamutuk nudar Organizasaun Non-Governmental ida ne'ebe halo monitor, analiza no relatoriu kona ba instituisaun internasional prinsipal sira iha Timor-Leste nebe iha relasaun ho rekonstrusaun no dezenvolvimentu fisiku, ekonomiku, no sosial nasaun ida ne'e nian. La'o Hamutuk fiar katak povu Timor-Leste mak tenki foti desijaun tomak iha prosesu ida ne'e no prosesu ne'e tenki demokratiku no transparente. La'o Hamutuk organijasaun independente ida no servisu atu fasilita Timor-oan sira atu partispa efektivu liu tan iha prosesu dezenvolvimentu nasaun ida ne'e nian. La'o Hamutuk mos servisu atu hadiak liu tan komunikasaun entre komunidade internasional no sosiedade Timor-Leste. Staf nasional no internasional iha La'o Hamutuk iha responsabilidade no simu salariu ne'ebe hanesan. Ikus liu, La'o Hamutuk mos sai sentru rekursu ida, oferese literatura kona ba modelu dezenvolvimentu nian.

La'o Hamutuk fo lisensa ba ema se deit atu reimprime artiklu ka grafika sira iha ami nia Buletin ho gratuita, maibe ami kontente atu hetan notifikasaun no kreditu ba ami nia servisu.

Ho espiritu atu haforsa liu tan transparensia, La'o Hamutuk konvida ita boot sira atu kontaktu ami se ita boot sira iha dokumentu no/ka informasaun ne'ebe tenki hetan atensaun husi Timor-oan tomak no komunidade internasional.
 

The Timor-Leste Institute for Development Monitoring and Analysis (La’o Hamutuk)
Institutu Timor-Leste ba Analiza no Monitor ba Dezenvolvimentu
Rua D. Alberto Ricardo, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: laohamutuk@gmail.com    Web: http://www.laohamutuk.org    Blog: laohamutuk.blogspot.com