Fahe Sertifikadu Efeitu Registu Bele Resolve Problema Rai?

Ba informasaun tan kona-ba asuntu rai bele asesu ami-nia pajina web:

Sé mak sei hetan rai liu husi esbosu Lei ba Rai tranzitoriú? (Ingles) – Fó informasaun kona-ba sé mak atu hetan rai liu husi Lei ba Rai, mudansa importante desde esbosu lei uluk sai, no problema sira.

Lei ba Rai Tranzitoriú (mos Ingles) – Inklui esbosu lei diferente iha lian tolu, submisaun sira no informasaun kona-ba prosesu konsultasaun publiku.

Kompensasaun Rai (Ingles) – Explika prosesu kompensasaun (ganti rugi) iha esbosu Lei ba Rai no esbosu Lei Expropriasaun. Mós explika La’o Hamutuk nia preokupasaun ho esbosu Lei ba Fundu Finanseira Imobiliariu.

Planu Estratejiku Dezenvolvimentu RDTL 2011-2030 (mos Ingles) – Seksaun Ameasa Direitu ba Rai esplora governu nia planu atu foti rai liu hektare 22,000, rai ne’ebé ema barak uja ba sira nia nesesidade sira lor-loron.

Buletin La’o Hamutuk Fevereiru 2010 (mos Ingles) – Ho artigu Justisa Rai iha Timor-Leste, Lei ba Rai Tranzitoriú no Konsultasaun Publiku kona-ba Lei ba Rai.

Prosesu Kona-ba Rai iha Timor-Leste (mos Ingles) – Ne’e fo sumariu ba prosesu ne’ebe liga ho rai ne’ebé akontese agora dadaun. Inklui dokumentu-sira, komentariu no analize husi parte diferente.

Surat Popular Esbosu Lei ba Rai, Outubru 2010

Sumisaun LH nian ba Parlamentu kona-ba esboso Lei ba Rai no Lei Expropriasaun , Setembru 2011

Prezidente Veto Lei Rai Tolu (Marsu 2012)

Iha Marsu 2010, Konsellu Ministru aprova lei tolu kona ba rai: esbosu Lei ba Rai, Lei Fundu Imobiliariu no Lei Expropriasaun. Aktualmente esbosu lei hirak ne’e sei iha Parlamentu Nasional no seidauk diskute. Maibe Novembru 2011 prosesu sukat rai husi Projetu Ita Nia Rai (INR) konsege ona sukat rai parcela 50.584 ho deklarante 54.509 iha vila distritu 13. Husi numeru parcela 50.584 rai ne'ebé mak hetan disputa 10.3% no laiha disputa 89.7%.

Maski 10 Dezembru 2011 senhora Lucia Lobato nudar Ministra Justisa (MJ) deklara ba publiku katak numeru disputa rai 8% tanba ne’e MJ fahe Sertfikadu Efeitus Registu, maibe iha fulan Novembru tuir dadus husi INR hatudu katak disputa rai 10.3%.

Maske Lei ba Rai seidauk hetan aprovasaun husi Parlamentu Nasional, maibe Ministeriu Justisa iha Marsu 2011 inisia atu dezenvolve Dekretu-Lei numeru 27/2011 Rejime atu Regula Na'in ba Bens Imoveis Laiha Disputa (mos Portuges no English) no promulga husi Prezidente Republika iha Jullu 2011. Dekretu-Lei ne'e atu fo sertifikadu nain ba rai ba sidadaun Timor ne’ebe la hetan disputa ba rai bazeia ba dadus ne'ebé mak regista ona husi INR. Sertifikadu ne’e sei aplika ba rai individu ka grupu kiik deit. Ne’e sei-la aplika ba rai kostume tanba seidauk regista.

Antes atu fahe sertifikadu presiza halo ona re-publikasaun mapa, atu povu hotu bele partisipa hodi fo sira nia informasaun no garante dunik katak ema ne’e bele hetan dunik sertifikadu ka la'e. Projetu INR halo ona re-publikasaun mapa primeiru iha Liquica 22 Agostu to'o 20 Setembru, Manatuto re-publikasaun primeiru iha 5 Setembru too 4 Outubru. Ainaro republikasaun 26 Setembru no taka 25 Outubru, iha tempu hanesan republikasaun segundu ba restu area kolesaun iha Liquica no Manatuto.

Iha 10 Dezembru 2011 iha Liquica, Ministra Justisa fahe ona Sertifikadu Efeitus Registu ba komunidade representante ema 15, nain 5 husi Liquica, 5 husi Manatuto no nain 5 seluk husi Ainaro. Hafoin ne’e komunidade sira presiza ba Diresaun Nasional Terras no Propriedade (DNTPSC) Distritu atu halo registu. [Hare ezemplu sertifikadu]

Maski Dekretu-Lei numeru 27/2011 atu regula nain ba bens imoveis, maibe foin lalais 10 Dezembru Ministra Justisa fahe deit Sertifikadu Efeitus Registu. Se wainhira komunidade atu garante ninia direitu ka halo tranferensia direitu ba ema seluk presiza ba halo registrasaun iha DNTPSC distritu, wainhira la halo registu mak direitu sei lakon.

Iha loron 2-3 Dezembru 2011 La’o Hamutuk koalia ho xefe suku no komunidade balun suku Maumeta Liquica. Sira preokupa kona ba sertifikadu efeitus registu mak sei fahe husi MJ. Ne’e signifika katak ami (komunidade) "seidauk klaru ho ami nia direitu nain ba rai no iha futuru se Governu hakarak atu foti ami nia rai bele foti deit tanba ami seidauk iha sertifikadu mak bele hatudu katak ami mak nain lolos ba rai ne’e." Komunidade mos kestiona tanba sa Ministeriu Justisa ho Projetu Ita Nia Rai tenke fakar osan bar-barak so deit atu fo sertifikadu efeitus registu no ne’e kontrariu ho deklarasaun Ministra Justisa iha 17 Agostu 2011 iha Liquica katak atu fahe sertifikadu nain ba rai la'os sertifikadu registu. Komunidade propoin diak liu fo sertifikadu nain ba rai atu bele garante sira nia nia direitu nomos sira bele halo aktividades tuir sira nia hakarak.

Tuir Konstituisaun RDTL Artigu 95 katak Parlamentu Nasional deit mak iha kbi'it atu halo lejislasaun kona-ba direitu, liberdade no garantia sira. Lei ne’ebe iha impaktu ba povu nia direitu fundamental tenki liu husi prosesu Parlamentar la bele sai hanesan Dekretu-Lei. Tuir estrutura lei: Konstituisaun RDTL, hafoin tuir Lei inan atu guia setor rai no hafoin bele kria Dekretu ka Lei Ministerial atu komplementa ba Lei inan ne’e. Dekretu-Lei numeru 27/2011 Ministra Justisa kria la tuir estrutura Lei no povu barak seidauk hatene kona ba lei ne’e tanba la-iha konsultasaun ho komunidade. Dekretu-Lei ne’e iha ligasaun ho esbosu Lei ba Rai hanesan direitu perfeitu, hak guna usaha, hak guna bangunan no aforamentu. Dekretu-Lei hot-hotu kona ba Rai tenki lao tuir Lei Inan kona ba rai ne'ebé Parlamentu aprova, oinsa mak Ministeriu Justisa bele halo Dekretu-Lei ida kona ba Rai no implementa ona maibe bainhira Lei Inan kona ba rai ne'e rasik Parlamentu seidauk aprova. Saida mak Ministeriu Justisa nia interese hodi fahe sertifikadu lalais no tanba sa la resolve kazus disputa ho 10.3% deit, atu ema hotu klaru kona ba sira nia direitu ba rai? La'o Hamutuk hanoin katak Parlamentu Nasional tenki husu Ministeriu Justisa hapara implementasaun Dekretu-Lei ne'e tanba la tuir prosesu ne'ebé mak los.

Tuir dadus balun ne'ebé mak LH hetan iha Dili, Liquica, Oecusse no Manatuto katak komunidade no membru governu balun preokupa ho dadus ne'ebé mak foti husi Ita Nia Rai seidauk bele garante atu fahe sertfikadu. Tuir lolos Ministeriu Justisa halo uluk evaluasaun ba servisu Ita Nia Rai nian iha distritu sira hodi haree se prosesu registu rai ne'e kredivel dunik kalae, molok deside asaun ruma ba oin, tanba iha kazu balu Ita Nia Rai halao servisu la diak. Iha Komoro, Aldeia Kampung Baru, ekipa Ita Nia Rai ba sukat Sr. Jose Pereira nia rai no marka baliza sein prezensa vizinhu sira nian, iha Oecusse, iha aldeia Makelap, agrikultor sira haktuir katak staff Ita Nia Rai sira ne'ebé mai sukat rai hateten ba agrikultor sira katak iha futuru sira ne'ebé iha rai luan sei selu taxa (maski Lei ba Rai seidauk aprova) no registu rai iha Oecusse, planu husi Projteu Ita Nia Rai atu hala’o iha suku lima iha vila, maibe registu hala’o iha suku ida deit mos la kompletu agora halo konfuzaun ba komunidade mak seidauk regista husi INR. Iha Liquica suku Maumeta staff Projteu Ita Nia Rai sukat parsela komunidade nian tama too iha mota laran ka tasi laran. Maski nune’e wainhira iha re-publikasaun mapa iha 22 Agostu-20 Setembru laiha mean (disputa).

Iha Oecusse vila Estadu foti rai komunidade nian husi metru 1-7 ba halo valeta hafoin Ita Nia Rai halo tiha ona registu. Ne'e automatikamente fo impaktu ba dadus ne’ebe mak INR kolekta no hatama ona ba sira nia sistema. Iha Manatutu no Liquica, bainhira sukat rai, Ita Nia Rai tau baliza ho fatuk ka ai-ida deit. Oinsa se iha ema ruma ne'ebé muda ona fatuk ka ai ne'e? Ami kestiona tebes hahalok fahe sertifikadu ba komunidade bazeia ba projektu ne'ebé hetan lamentasaun husi parte barak. No tuir lolos prosesu sukat rai atu hetan sertifikadu ne'e halao husi Diresaun Nasional Terras no Propriedade Timor-Leste nian, bazeia ba lei inan kona ba rai, laos husi projektu ne'ebé hetan fundus husi Estadu Unidus Amerika ne'ebé iha intereses ba privatizasaun rai iha Timor-Leste, la'os interese ba povu Timor-Leste nia di'ak.

Iha nasaun Kambodia Governu hakerek lei kuaze besik hanesan hodi fo titulu ba rai ka uma ne’ebe mak la-iha disputa. Governu la resolve rai disputadu sira, too ikus rai disputadu sai abandonadu, tanba komunidade sira la-iha kapasidade naton atu lori kazu disputadu sira ba prosesa iha tribunal, no ne’e meius ida ne’ebe Estadu uza hodi foti rai barak husi komunidade sira liu-liu sira ne’ebe mak vulneravel.

Timor Leste nudar estadu demokratiku presiza iha partisipasaun komunidade wainhira estadu desenvolve politika ka lei, liu-liu lei sira ne’ebe mak iha ligasaun forte ho sira nia moris. Atu nune’e garante dunik povu ninia direitu no nudar nasaun direitu demokratika.